Ֆինլանդիան լայնածավալ զորավարժություններ կանցկացնի՝ մոտ 15 հազար զինծառայողի մասնակցությամբ, որոնք տեղի կունենան նոյեմբերից մինչև դեկտեմբեր ընկած ժամանակահատվածում, այդ թվում՝ Ռուսաստանի հետ սահմանակից շրջաններում։ Այս մասին հայտնել են Ֆինլանդիայի ցամաքային ուժերը։ Համաձայն հայտարարության, զորավարժությունների նպատակն է ապահովել զորակոչիկների, պահեստազորայինների և բանակային ստորաբաժանումների անձնակազմի համատեղ պատրաստությունը «ռազմական ժամանակներում պարտականությունները կատարելու համար»։ Մանևրերին կմասնակցեն նաև դաշնակից պետությունների զորքերը։
Այս զորավարժություններն անցկացվում են Ֆինլանդիայում ՆԱՏՕ-ի ռազմական ենթակառուցվածքի ամրապնդման ֆոնին։ Սեպտեմբերի 1-ից Ռուսաստանի սահմանից 140 կիլոմետր հեռավորության վրա գտնվող Միկկելի քաղաքում սկսել է գործել ՆԱՏՕ-ի ցամաքային զորքերի տարածաշրջանային հրամանատարության շտաբը։ Առաջին փուլում այնտեղ կաշխատեն մոտ տասը սպաներ, իսկ հետագայում անձնակազմի թիվը կհասնի մինչև 50-ի։ ՆԱՏՕ-ի «Նորֆոլք» (ԱՄՆ) հրամանատարության ղեկավարությամբ գործող նոր կառույցը զբաղվում է հյուսիսային տարածաշրջանում դաշինքի ցամաքային ուժերի կառավարմամբ, ազգային բանակների գործողությունների համակարգմամբ, ինչպես նաև զորավարժությունների և գործողությունների համատեղ պլանավորմամբ։
Արդեն սեպտեմբերի 5-ին Ռուսաստանի Անվտանգության խորհրդի նախագահի տեղակալ Դմիտրի Մեդվեդևն աշխատանքային այց է կատարել Լենինգրադի մարզ, որի ընթացքում հայտարարել է, որ Վլադիմիր Պուտինը ցուցումներ է տվել Ֆինլանդիայի հետ սահմանի ամրապնդման վերաբերյալ։ Տեղի պաշտոնյաների հետ հանդիպմանը նա հայտարարել է սահմանամերձ շրջաններում ամրաշինական կառույցների կառուցման մասին՝ այդ միջոցառումները բացատրելով Ֆինլանդիայի՝ ՆԱՏՕ-ին անդամակցելով։
Ֆինլանդիան Հյուսիսատլանտյան դաշինքի անդամ է դարձել 2023 թվականի գարնանը՝ հրաժարվելով ռազմական չեզոքության տասնամյակներից՝ Ռուսաստանի կողմից Ուկրաինա լայնամասշտաբ ներխուժումից հետո։ Նրան հետևել է Շվեդիան, որն անդամակցության գործընթացն ավարտել է 2024 թվականի գարնանը։ Սա ՆԱՏՕ-ի և Ռուսաստանի սահմանի երկարությունը մեծացրել է ավելի քան 1300 կիլոմետրով։ Միևնույն ժամանակ, Վլադիմիր Պուտինը, որն ի սկզբանե Ուկրաինայի վրա հարձակումը բացատրում էր ՆԱՏՕ-ի ընդլայնումը թույլ չտալու անհրաժեշտությամբ, Ֆինլանդիայի և Շվեդիայի դիմումներից հետո հայտարարել է, որ Մոսկվան նրանց անդամակցությունը դաշինքին «չի դիտարկում որպես լուրջ սպառնալիք»։ «Եթե ուզում են՝ խնդրեմ», - ասել է նա։
