Փետրվարի 12-ին Ադրբեջանում Եվրամիության (ԵՄ) դեսպան Պյոտր Միխալկոն կանչվել է երկրի արտաքին գործերի նախարարություն։
Այս մասին հայտնում է Ադրբեջանի ԱԳՆ-ն։
Հանդիպման ընթացքում լուրջ մտահոգություն է արտահայտվել Հայաստանում Եվրոպական միության դիտորդական առաքելության (EUMA) գործունեության վերաբերյալ, ինչը, ըստ Բաքվի, «հակասում է այս առաքելության և նրա գործունեության վերաբերյալ նախնական պայմանավորվածություններին»։
Նշվել է, որ ի տարբերություն տարածաշրջանում կայունության և Ադրբեջանի և Հայաստանի միջև վստահության հաստատման հայտարարված նպատակների, «առաքելությունը լայնորեն օգտագործվում է որպես հակաադրբեջանական քարոզչության գործիք»։
ԵՄ դեսպանի ուշադրությանն է ներկայացվել, որ առաքելությունը, դարձել է «հեռադիտակային դիվանագիտության գործակալ»՝ նպաստելով տարբեր եվրոպացի պաշտոնյաների և ոչ պաշտոնական պատվիրակությունների այցերին սահմանամերձ շրջաններ։
