Չեչնիայում ռուսական գվարդիայի և ներքին գործերի նախարարության աշխատակիցները սկսել են տնետուն այցելություններ կատարել և ձերբակալել տղամարդկանց՝ Ուկրաինա պատերազմի ուղարկելու համար, հայտնում է «Մեմորիալ» իրավապաշտպան կենտրոնը։
Կենտրոնի հաղորդմամբ՝ Չեչնիայի անվտանգության ուժերը վերադարձել են 2000-ականների սկզբի «մաքրման գործողությունների» պրակտիկային՝ հոկտեմբերի 24-ին Գրոզնիի շրջանի Պետրոպավլովսկայա գյուղում Ազգային գվարդիայի շարասյան գնդակոծությունից հետո։ Դեպքից երկու օր անց նրանք սկսել են տներ այցելել Պետրոպավլովսկայայի մոտ գտնվող բոլոր բնակավայրերում։ Անվտանգության ուժերը ստուգել են անձնագրերը և տրանսպորտային միջոցների փաստաթղթերը, ստուգել տնային տնտեսությունները և փնտրել չգրանցված անձանց:
Ամենափոքր խախտումները հայտնաբերելուց հետո բերման են ենթարկել զինվորական ծառայության պիտանի տղամարդկանց և տարել ոստիկանական բաժանմունքներ։ Դրանից հետո նրանց հեռախոսներն առգրավվել են, որոնք անվտանգության ուժերը ստուգել են Չեչնիայի իշխանությունների քննադատների Telegram ալիքներին բաժանորդագրվելու համար։ Եթե որևէ մեկը հայտնաբերվեր, ապա ձերբակալվածներին առաջարկվել է ընտրություն՝ կա՛մ նրանք կգնան ռազմաճակատ, կա՛մ քրեական գործ կհարուցեն նրանց դեմ, գրում է Memorial-ը։
Իրավապաշտպանների տվյալներով՝ Ստարոպրոմիսլովսկու բաժանմունքներից մեկում կա 20 ձերբակալվածներից բաղկացած խումբ, և ընդհանուր առմամբ հարյուրավոր մարդիկ են ձերբակալվել Գրոզնիի շրջանում «մաքրման գործողությունների» ընթացքում։ Ընդ որում, նրանց հարազատները վախենում են ինչ-որ բան ասել՝ մտերիմների ճակատագիրը ծանրացնելու վախից։
Պաշտոնական տվյալներով՝ հոկտեմբերի 24-ին ռուսական գվարդիայի շարասյան գնդակոծության հետեւանքով մեկ իրավապահ զոհվել է, եւս մեկը՝ վիրավորվել։ Տեղի բնակիչները իրավապաշտպանների հետ զրույցում ենթադրել են, որ հարձակումն իրականացրել են հենց ուժայինները, որպեսզի «մաքրման գործողություններ» սկսեն և հավաքեն մարդկանց՝ Ուկրաինա պատերազմի ուղարկելու համար։
