Իսրայելի պաշտպանության բանակը՝ ՑԱՀԱԼ-ը, հայտարարել է, որ վերահսկողություն է հաստատել Գազա քաղաքի 40%-ի նկատմամբ: «Գործողությունը կընդլայնվի և կակտիվանա: Մենք կշարունակենք հետապնդել ՀԱՄԱՍ-ին ամենուրեք»,- հայտարարել է ՑԱՀԱԼ-ի խոսնակ, բրիգադի գեներալ Էֆի Դեֆրինը: Նրա խոսքն է մեջբերում Reuters-ը:
Նա շեշտել է, որ ռազմական առաքելությունը կավարտվի, երբ ազատ արձակվեն բոլոր իսրայելցի պատանդները, և վերացվի պաղեստինյան իսլամիստական արմատական շարժման՝ ՀԱՄԱՍ-ի կառավարումը: Ավելի վաղ Իսրայելը կոչ էր արել խաղաղ բնակիչներին հեռանալ Գազայից իրենց անվտանգության համար, գրում է Reuters-ը: Իսրայելական կողմի տվյալներով՝ 70000 մարդ արդեն լքել է քաղաքը:
ՑԱՀԱԼ-ը Գազա քաղաքի վրա հարձակումը սկսել է օգոստոսի 20-ին, իսկ օգոստոսի 29-ին այն հայտարարել է «մարտական գործողությունների վտանգավոր գոտի»: Վարչապետ Բենիամին Նեթանյահուի գրասենյակն էլ հայտարարել է, որ պատերազմը կարող է ավարտվել միայն բոլոր պատանդների ազատ արձակման, ՀԱՄԱՍ-ի լիակատար զինաթափման, Գազայի հատվածի ապառազմականացման և Իսրայելի կողմից անվտանգության վերահսկողության հաստատման դեպքում։
