ԵՄ դիվանագիտական ծառայության ղեկավար Ժոզեպ Բորելը համայնքի երկրներին առաջարկել է դադարեցնել քաղաքական երկխոսությունը Իսրայելի հետ՝ պատճառաբանելով Գազայի հատվածում իսրայելական ռազմական գործողության ընթացքում մարդու իրավունքների հնարավոր խախտումները։ Այս մասին հայտնում է Reuters-ը՝ հղում անելով եվրոպացի դիվանագետներին եւ Բորելի համապատասխան նամակին։
Գործակալության տվյալներով՝ նամակն ուղարկվել է ԵՄ ԱԳ նախարարներին չորեքշաբթի՝ նոյեմբերի 18-ին Բրյուսելում նրանց հանդիպումից մի քանի օր առաջ։ Բորելի համար արտգործնախարարների այս գագաթնաժողովը վերջինը կլինի որպես ԵՄ արտաքին գործերի և անվտանգության քաղաքականության բարձրագույն ներկայացուցիչ, քանի որ նա կհեռանա պաշտոնից դեկտեմբերի 1-ին, երբ նոր Եվրահանձնաժողովը ստանձնի պաշտոնը:
Նամակում Բորելը «լուրջ մտահոգություն է հայտնում Գազայում միջազգային մարդասիրական իրավունքի հնարավոր խախտումների վերաբերյալ» և նաև նշում, որ, իր կարծիքով, «Իսրայելը դեռ պատշաճ կերպով չի արձագանքել այդ մտահոգություններին։ Քաղաքական երկխոսության մեխանիզմը նախատեսված է ԵՄ-ի և Իսրայելի միջև համաձայնագրով, որը կարգավորում է երկկողմ հարաբերությունները։ «Այս հանգամանքների լույսի ներքո ես ԵՄ-ին առաջարկություն կներկայացնեմ՝ օգտագործելու [երկկողմանի համաձայնագրի] մարդու իրավունքների դրույթը՝ Իսրայելի հետ քաղաքական երկխոսությունը դադարեցնելու համար»,- ասել է Բորելը, որը մեջբերում է Reuters-ը:
Գործակալության զրուցակիցները նշել են, որ նախաձեռնությունը դժվար թե աջակցություն ստանա, քանի որ այս դեպքում անհրաժեշտ է անդամ բոլոր 27 երկրների հավանությունը։ Նրանց խոսքով՝ ԵՄ-ի անանուն ներկայացուցիչը չորեքշաբթի օրը Բրյուսելում տեղեկացրել է համայնքի երկրների մշտական ներկայացուցիչներին, որոնցից շատերը դեմ են արտահայտվել։ Միևնույն ժամանակ, Բորելի նախաձեռնությունը անհանգստության «ուժեղ ազդանշան» կուղարկի այն մասին, թե ինչպես է Իսրայելն իրականացնում իր ռազմական գործողությունը, գործակալությանը ասել է դիվանագետներից մեկը:
