«Էականը ընտրողներն են. ԲԴԽ նախագահ ընտրել են դատավորները, որոնք հանրության մոտ ունեն վստահության շատ ցածր մակարդակ: Բնականաբար, այստեղ մեկ այլ տրամաբանություն չի կարող լինել, թե եկեք՝ այդ ընտրությանը վստահենք: Ավելին՝ հաշվի առնելով, որ, ցավոք սրտի, այդ դատավորները միշտ գործել են քաղաքական իշխանության հրահանգով և հիմա էլ դիրքավորվում են այնպես, թե ինչպիսի որոշում կայացնեն կամ ինչպես իրենց պահեն, որպեսզի հնարավորինս բարենպաստ հարաբերություններ և վերաբերմունք ունենան»,-ասաց Սաքունցը:
Սաքունցի կարծիքով՝ դատական իշխանությունը պետք է ենթարկվի լուրջ զտման: Նա խնդրահարույց համարեց նաև փաստը, որ ԲԴԽ նախագահի ընտրությունը կատարվել է առանց լրատվամիջոցների. «Նշանակում է՝ հանրությունից թաքցնելու բան կա: Երբ դատավորների մեծամասնութունը որոշում է, որ ընտրությունը լրագրողների համար պետք է փակ լինի, արդեն իսկ վեթինգի հիմնավորումներից մեկն է»:
«Մենք հերթական անգամ գործ ենք ունենում ԲԴԽ անդամների ընդամենը փոփոխության հետ»,-ընդգծեց Հելսինկյան քաղաքացիական ասամբլեայի Վանաձորի գրասենյակի ղեկավարը:
