Հայաստանյան իշխանությունները հանրությանը չեն ներկայացնում այն իրական գործընթացները, որ տեղի են ունենում Արցախում, այլ մատուցում են լուրեր, որոնք բացարձակ կապ չունեն ընթացող գործընթացների հետ: Լրագրողների հետ հանդիպմանն այս մասին հայտնեց «Ազգային անվտանգություն» կուսակցության նախագահ Գառնիկ Իսագուլյանը:
Ըստ նրա՝ հենց այս հանգամանքով էր պայմանավորված Արցախի Անվտանգության խորհրդի նախկին քարտուղար Վիտալի Բալասանյանի վերջին ասուլիսը.
«Լինելով մարդ, որ պատասխանատու է զգում Արցախի և Հայաստանի ճակատագրի համար, ստիպված գնաց բաց զրույցի և բացեց բոլոր փակագծերը՝ մատնանշելով, թե ինչ է ասվում, և ինչ է իրականում արվում»:
Գ. Իսագուլյանը նշեց, որ նախքան այդ ասուլիսն արդեն տարբեր լրատվական գործակալությունների հետ զրույցներում Վ. Բալասանյանը մատնանշել էր այն գործընթացները, որոնք տեղի են ունենում Հայաստան-Արցախ փոխհարաբերություններում:
«Ազգային անվտանգություն» կուսակցության նախագահն ընդգծեց, որ Վ. Բալասանյանի հայտարարությունները եկան փաստելու Նիկոլ Փաշինյան-Բակո Սահակյան վերջին հանդիպումը.
«Եթե նայում եք, ընդունում է Բակո Սահակյանին, շատ ցայտուն դրված է ՀՀ դրոշը… և հարգելի նախագահ, մինչդեռ նախագահներին «հարգելի»-ով չեն դիմում և անմիջապես՝ հարգելի մարզպետ: Ճիշտ է՝ հիմա փորձում են ասել, թե Բ. Սահակյան է ասել, բայց Սահակյանն ուր, մարզպետն ուր:
Հայտարարեցիք՝ մարզ է, ի՞նչ է փոխվելու, Ադրբեջանն իր ագրեսիվ նկրտումները դադարեցնելո՞ւ է»:
Վ. Բալասանյանի հայտարարություններից հետո նրա հասցեին ՀՀ Անվտանգության խորհրդի քարտուղար Արմեն Գրիգորյանի հայտարարությունների շուրջ բանախոսի գնահատականը շատ կոշտ էր. «ԱԱԽ քարտուղարը՝ մարդ, որ առաջնորդում է կապույտ մազերով աղջիկներին Արցախի դեսպանատուն՝ պլակատներով, հիմա դարձել է ՀՀ ԱԱԽ քարտուղար և Վիտալի Բալասանյանի նման մարդուն հայտարարում է «խուլիգան», ա՛յ ոչնչություն, դու կհամարձակվե՞ս քայլել Արցախի հրապարակով, կամ որևէ տեղ, որ սահմանից 100 կմ հեռու է»:
Անդրադառնալով Երևանում ոստիկանի սպանության աղմկահարույց միջադեպին՝ Գ. Իսագուլյանը նկատեց, որ այն, ինչ անում է Փաշինյանը, ոչ միայն Արցախը, այլև Հայաստանն էլ է տանելու կործանման. «Այն, ինչ ասում է Բալասանյանը, գործնական կյանքում ապացուցվում է»:
Անդրադառնալով Երևանում տեղի ունեցած ողբերգական դեպքին և ոստիկանի սպանությանը, Գ. Իսագուլյանը նշեց՝ դա «Սասնա ծռերի» կողմից ՊՊԾ գրավման հետևանքն է.
«Հիմնական հետևանքն է նրա, երբ «Սասնա ծռերը» գրավել են ՊՊԾ գունդը, երեք ոստիկան են սպանել, և այդ մարդիկ ոչ միայն ազատության մեջ են, այլև բարձր մակարդակով ընդունելության են արժանանում:
Եթե ՊՊԾ գնդի մարդասպաններն ազատ ման են գալիս, և ոչ միայն ման են գալիս, այլև արժանանում են վարչապետի ընդունելությանը, վարչապետը նրանցով ստեղծում է իր մարտական թևը ՝ահաբեկելու մյուս քաղաքական ուժերին, բնականաբար, այգիներում ոստիկանի նկատմամբ այդ բռնությունը կիրառվելու է»:
