Վատիկանում Դոնալդ Թրամփի հետ 15 րոպեանոց զրույցի ժամանակ Ուկրաինայի նախագահ Վլադիմիր Զելենսկին կոչ է արել ԱՄՆ նախագահին ավելի կոշտ դիրքորոշում որդեգրել Վլադիմիր Պուտինի նկատմամբ և վերանայել հրադադարի առաջնահերթությունները, հաղորդում է Axios-ը՝ հղում անելով իր աղբյուրներին։
Պարբերականի տվյալներով՝ Զելենսկու խորհրդականները տարբեր կարծիքներ ունեին այն մասին, թե արդյոք նա պետք է ռիսկի դիմի Թրամփի հետ դեմ առ դեմ զրույց ունենալու «Օվալաձև աշխատասենյակում տեղի ունեցած «աղետից» հետո»։ Սակայն, Axios-ի աղբյուրների փոխանցմամբ, Զելենսկին, ի վերջո, զգացել է, որ իրեն հաջողվել է առաջին անգամ փոխել Թրամփի կարծիքը Պուտինի մասին։ Եվ Իտալիայից վերադառնալիս ամերիկացի նախագահը լրագրողների հետ զրույցում քննադատել է Ռուսաստանի նախագահին Կիևի վրա զանգվածային հարձակման համար։
«Զելենսկիի խորհրդականները նյարդային էին, իսկ ոմանք՝ դեռևս տրավմատիզացված փետրվարի 28-ի Օվալաձև աշխատասենյակում տեղի ունեցած տեսարանից, Զելենսկիին ասել են, որ վստահ չեն, որ դա լավ գաղափար է», - ասվում է հոդվածում։ Աղբյուրներից մեկը Axios-ին ասել է, որ նախապես ոչինչ որոշված չէր, և սկզբնական գաղափարն այն էր, որ նրանք կփորձեին հանդիպել հուղարկավորությունից հետո։
Առաջնորդները հանդիպեցին միմյանց Վատիկան ժամանելուն պես և առանձին հանդիպման վայր գտան Սուրբ Պետրոսի տաճարում։ Աղբյուրների համաձայն, Զելենսկին Թրամփին ասել է, որ Պուտինը չի փոխի իր դիրքորոշումը, եթե ԱՄՆ նախագահը իր վրա ավելի մեծ ճնշում չգործադրի։
Աղբյուրներից մեկի խոսքով՝ Թրամփը պատասխանել է, որ հնարավոր է՝ ստիպված լինի փոխել իր մոտեցումը Պուտինի նկատմամբ։ Պարբերականը գրում է, որ Զելենսկին նաև հորդորել է Թրամփին վերադառնալ խաղաղության բանակցությունների մեկնարկային կետի՝ անվերապահ հրադադարի իր նախնական առաջարկին, որն Ուկրաինան ընդունել է, բայց Ռուսաստանը մերժել։ Մի աղբյուր ասել է, որ Թրամփը, կարծես, համաձայն է։
