Ավստրիայի ազգային հետախուզական ծառայությունը Վիեննայում հայտնաբերել է զենքի պահեստ, որը, ենթադրաբար, կապված է պաղեստինյան ՀՄԱՍ խմբավորման հետ՝ «Եվրոպայում հնարավոր ահաբեկչական հարձակումների» համար, հաղորդում է Associated Press-ը։
Ըստ Ներքին գործերի նախարարության հայտարարության՝ երկուշաբթի Լոնդոնում ձերբակալվել է 39-ամյա բրիտանացի քաղաքացի, որը, ենթադրաբար, սերտ կապեր ունի զենքի պահեստի հետ։
«Հետաքննության ներկա վիճակով՝ այս հարձակումների թիրախը, հավանաբար, եղել են Եվրոպայում գտնվող իսրայելական կամ հրեական հաստատությունները», - նշված է հայտարարության մեջ։
Զենքի պահեստը և կասկածյալը երկրի Պետական անվտանգության և հետախուզության վարչության (DSN)՝ «ՀԱՄԱՍ-ի հետ կապված համաշխարհային ահաբեկչական կազմակերպության» միջազգային համակարգված հետաքննության մաս էին կազմում։
Հետաքննության ընթացքում նախարարությունը հայտարարել է, թե իր հետախուզական ծառայությունը բացահայտել է «կասկածներ, որ որոշակի խումբ զենք է ներմուծել Ավստրիա՝ Եվրոպայում հնարավոր ահաբեկչական հարձակումներում օգտագործելու համար»։
Զենքի պահեստը, որը, ենթադրաբար, պատկանում է ՀԱՄԱՍ-ի հետ կապված չճշտված արտասահմանյան գործողություններին, հայտնաբերվել է Վիեննայում՝ վարձակալած պահեստում պահվող ճամպրուկի մեջ և պարունակում էր հինգ ատրճանակ և 10 փամփուշտատուփ։
«Այս դեպքը ևս մեկ անգամ ցույց է տալիս, որ Պետական անվտանգության և հետախուզության գործակալությունն ունի գերազանց միջազգային ցանց և հետևողական գործողություններ է ձեռնարկում ծայրահեղականության բոլոր ձևերի դեմ,- ասել է Ավստրիայի ներքին գործերի նախարար Գերհարդ Կարները,- Առաքելությունը հստակ է. զրոյական հանդուրժողականություն ահաբեկիչների նկատմամբ»։
