Ղազախստանի մայրաքաղաք Աստանայում 2026 թվականին կբացվի «Թումո» ստեղծարար տեխնոլոգիաների կենտրոնը։ Այս մասին Հայաստանի վարչապետ Նիկոլ Փաշինյանի հետ բանակցություններից հետո կայացած հայտարարության ժամանակ ասաց Ղազախստանի նախագահ Կասիմ-Ժոմարտ Տոկաևը։
Տոկաևի խոսքով՝ արհեստական բանականության և թվայնացման ոլորտները կարևոր ուղղություններ են երկու երկրների համագործակցության զարգացման համար։
«Ղազախստանում թվայնացումն արագ և դինամիկ է զարգանում։ Հայաստանը նույնպես էական հաջողությունների է հասել։ Այս ոլորտը հանդիսանում է նոր լոկոմոտիվ, որը հնարավորություն կտա խթանել երկու երկրների տնտեսությունների զարգացումը։ Մենք համաձայնության ենք եկել փոխանակել մեր փորձը արհեստական բանականության տեխնոլոգիաների և թվայնացման ուղղությամբ»,-նշեց Ղազախստանի նախագահը։
Նա ընդգծեց, որ համագործակցության շրջանակում նախատեսվում է ստեղծել նոր կրթական և տեխնոլոգիական հարթակ։
«Մյուս տարի Alem.ai կառույցի հիման վրա կստեղծվի «Թումո» Աստանա կազմակերպությունը»,-հայտարարեց Տոկաևը։
Բանակցությունների ընթացքում անդրադարձ է եղել նաև կրթական ու առողջապահական համագործակցությանը։
«Ուսանողների փոխանակման համար ստորագրել ենք միջկառավարական համաձայնագրեր։ Մեծ պոտենցիալ կա առողջապահության ոլորտում՝ համաձայնեցրել ենք անցկացնել Հայաստանում Ղազախստանի, իսկ Ղազախստանում՝ Հայաստանի բժշկության օրեր»,-ասաց Ղազախստանի նախագահը։
Տոկաևը նշեց նաև մշակութային և մարդասիրական կապերի զարգացումը երկու երկրների միջև։
«Անցած տարի Աստանայում անցկացվեցին հայկական մշակույթի օրեր, իսկ Երևանում կազմակերպվեցին ղազախական մշակույթի միջոցառումներ։ Երևանում բացվել է Աբայի անվան պուրակ, իսկ այսօր Աստանայում բացվել է Սուրբ Մեսրոպ Մաշտոցի անվան փողոց։ Սա արտահայտում է մեր ժողովուրդների հոգևոր սերտությունը»,- եզրափակեց Տոկաևը։
