Մի երկիր մյուսից պահանջում է փոխել Սահմանադրությունը։ Աշխարհում նման բան չկա։ Այս մասին հոկտեմբերի 30-ին Ազգային ժողովի նիստում, Մրցակցության և սպառողների շահերի պաշտպանության հանձնաժողովի անդամի ընտրության հարցի քննարկման ժամանակ, հայտնել է ընդդիմությունից փոխխոսնակ, «Ուժեղ Հայաստան» խմբակցության պատգամավոր Արամ Վարդևանյանը։
Նա, մասնավորապես, հիշեցրել է երկրի գործող վարչապետ Նիկոլ Փաշինյանի նախընտրական կարգախոսներն ու հավաստիացումները։ Վերջինս, ինչպես նշել է ԱԺ փոխնախագահը, փաստացի ստում էր քաղաքացիներին, երբ պնդում էր, թե Ադրբեջանի հետ երկար սպասված խաղաղությունը ձեռք է բերվել, քանի որ ընտրություններում հաղթանակից հետո իշխանության հռետորաբանությունը փոխվել է։ Պարզվեց, որ Ադրբեջանն ունի նախապայման, որը վերաբերում է Հայաստանի Սահմանադրության փոփոխությանը։ Սկզբում, Վարդևանյանի խոսքով, իշխանությունները փորձում էին մեղմել իրավիճակը՝ դա ներկայացնելով որպես ներքին սպառման համար նախատեսված Բաքվի հռետորաբանություն։ Սակայն հետագայում պարզվեց, որ խոսքը նախապայմանի մասին է։
Պատգամավորը համոզված է․ եթե Փաշինյանն ասեր ճշմարտությունը, ընտրությունների արդյունքները կարող էին բոլորովին այլ լինել։
«Նիկոլ Փաշինյանը պատասխան չունի այն հարցերին, որոնք վերաբերում են 300 հազար ադրբեջանցիների հնարավոր «վերադարձին», այսպես կոչված «Արևմտյան Ադրբեջանին», անկլավներին և էքսկլավներին։ Այս ամենին Նիկոլ Փաշինյանը պատասխան չունի։ Հայաստանի քաղաքացիների քվեն կարող էր այլ լինել», - պարզաբանել է ընդդիմությունից ԱԺ փոխնախագահը՝ հիշեցնելով, որ «Քաղաքացիական պայմանագիրը», այդուհանդերձ, չկարողացավ խորհրդարանում բացարձակ մեծամասնություն ապահովել իր համար։
Այս փաստը, Վարդևանյանի կարծիքով, ակնհայտորեն հաստատում է, որ գործող իշխանությունը կորցրել է հասարակության զգալի մասի աջակցությունը։
