ԱԺ արտաքին հարաբերությունների մշտական հանձնաժողովի նիստում «Բարգավաճ Հայաստան» խմբակցության քարտուղար Արման Աբովյանը հարց ուղղեց փոխարտգործնախարար Ավետ Ադոնցին՝ ճշտելով, թե Հայաստանի և Ադրբեջանի ժողովուրդներին խաղաղության պատրաստելու գործընթացն արդյո՞ք համաչափ է իրականացվում, եթե հաշվի առնենք, որ Երևանում օրեր առաջ կազմակերպվել էր ցուցահանդես, որում պատկերված էին վրաստանաբնակ հայեր և ադրբեջանցիներ:
Ցուցահանդեսը կրել է «Կարող ենք ապրել միասին» խորագիրը:
«Իհարկե, համաչափ չէ այսօրվա դրությամբ: Վարչապետի վերջին հայտարարությունն այդ առումով լրացնում է ձեր ասածը, որ վարչապետն էլ է պատրաստ այդ անհամաչափության դեֆիցիտը լրացնել: Այդ ագրեսիվ հռետորաբանությունը, որը տիրում է իրենց քաղաքական շրջանակներում … Սա գործընթաց է, որ առանց այդ վստահության մթնոլորտի ձևավորման, առանց խաղաղության պատրաստելու հակամարտության կարգավորման որևէ բանակցություն չի կարող անցկացվել»,- պատասխանել է Ավետ Ադոնցը:
