Ապրիլի 1-ից կենսաթոշակներն ու նպաստները Հայաստանում վճարվելու են բացառապես անկանխիկ եղանակով։ Այս մասին ՀՀ կառավարության նիստում հայտարարեց Աշխատանքի և սոցիալական հարցերի նախարար Արսեն Թորոսյանը։
Նրա խոսքով՝ համապատասխան օրենքն ընդունվել է դեռ դեկտեմբերին, իսկ կառավարության որոշումներով այժմ կարգավորվում է ամբողջ գործընթացը։
«Ապրիլի 1-ից բոլոր կենսաթոշակները և նպաստները վճարվելու են անկանխիկ եղանակով։ Մինչև մարտի 5-ը խնդրում ենք մեր բոլոր կենսաթոշակառուներին և նպաստառուներին ինքնուրույն ընտրել բանկը և ստանալ բանկային քարտ»,-ասաց Թորոսյանը։
Նա նշեց, որ եթե մինչև մարտի 5-ը քաղաքացիները ինքնուրույն ընտրություն չկատարեն, բանկը կընտրվի ավտոմատ եղանակով՝ համակարգի միջոցով, պատահականության սկզբունքով։
«Եթե ընտրությունը կատարվի ավտոմատ, ապա մինչև ապրիլի 1-ը հնարավոր չի լինելու փոխել վճարող բանկը, որպեսզի ապահովենք սահուն անցումը»,-ընդգծեց նախարարը։
Թորոսյանի տվյալներով՝ դեկտեմբերի սկզբին մոտ 50 հազար քաղաքացի կենսաթոշակ կամ նպաստ էր ստանում կանխիկ եղանակով, մինչդեռ ներկայումս այդ թիվը նվազել է մինչև 21 հազար 539։
«Մոտ 30 հազար քաղաքացի արդեն ինքնուրույն անցել է անկանխիկի դաշտ, և օրական ևս 1000-1500 քաղաքացի շարունակում է անցնել»,-նշեց նա։
Նախարարությունը նախատեսում է սուրհանդակային ծառայությամբ բանկային քարտերը հասցնել այն քաղաքացիներին, որոնք օբյեկտիվորեն չեն կարող ինքնուրույն գնալ բանկ։ Նախնական ցանկում ընդգրկվելու են 85 տարեկանից բարձր անձինք, ինչպես նաև 75-85 տարեկան ծանր սահմանափակումներ ունեցող քաղաքացիները։
Թորոսյանը նաև ներկայացրեց անկանխիկ վճարումների հետվճարի ծրագրի տվյալները։ Նրա խոսքով՝ հունվարին արդեն 445 հազար 228 քաղաքացի օգտվել է ծրագրից, ինչը շուրջ 15 հազարով ավելի է դեկտեմբերի համեմատ։
Հունվարին քաղաքացիներին վերադարձվել է 2.9 միլիարդ դրամ՝ նախորդ ամսվա 1.8 միլիարդի դիմաց։ Միջին հետվճարը կազմել է մոտ 7000 դրամ, իսկ առավելագույն շեմը սահմանված է 10 հազար դրամ՝ 20 տոկոսի չափով։
