Ապօրինի պահվող զենք-զինամթերքի հայտնաբերման ու առգրավման միջոցառումները Ոստիկանության տարածքային ստորաբաժանումների ծառայողների կողմից շարունակվում են առավել հետևողականությամբ: Միաժամանակ իրականացվում են բացատրական աշխատանքներ, որոնց շնորհիվ բնակչության կողմից շարունակվում են ապօրինի պահվող զենք-զինամթերքի կամավոր հանձնումները:
Ապօրինի պահվող զենք-զինամթերքի հայտնաբերման հերթական դեպքերն են արձանագրվել Համայնքային ոստիկանության Ապարանի բաժնի ծառայողների կողմից:
Համայնքային ոստիկանները օպերատիվ տեղեկություն էին ստացել, որ Մեծամորի բնակիչ 28-ամյա երիտասարդը մեքենայում զենք-զինամթերք է ապօրինի պահում: Նա ձերբակալվել և «Նիսան» մակնիշի մեքենայով հանդերձ՝ տեղափոխվել է բաժին, որտեղ տարված բացատրական աշխատանքի արդյունքում մեքենայի բեռնախցիկից ներկայացրել է «ՏՕԶ-8» տիպի հրազեն և փամփուշտներ:
28-ամյա երիտասարդը կազմված փաստաթղթերի հետ ներկայացվել է նախաքննական մարմին:
Ապօրինի զենք-զինամթերք պահելու վերաբերյալ հաջորդ օպերատիվ տեղեկությունը ստացվել է մարտի 20-ին:
Իրացնելով օպերատիվ տեղեկությունը՝ համայնքային ոստիկանները ձերբակալել և բաժին են տեղափոխել Հնաբերդ գյուղի բնակիչ 63-ամյա մի տղամարդու: Բացատրական աշխատանքի արդյունքում նա հայտնել է, որ ոստիկանների տեղեկությունը հավաստի է:
Նախաձեռնվել է քրեական վարույթ, որի շրջանակում կատարված զննությամբ 63-ամյա տղամարդու տանը հայտնաբերվել են մեկփողանի որսորդական հրացան, նռնակներ, պայթուցիչներ, օդամղիչ հրացաններ, փամփուշտներ:
Հնաբերդ գյուղի բնակիչ 63-ամյա տղամարդը ձերբակալվել և տեղափոխվել է ձերբակալվածների պահման վայր: Կատարվում է նախաքննություն:
ՆԳՆ ոստիկանությունը հորդորում է քրեական պատասխանատվությունից խուսափելու համար կամավոր հանձնել ապօրինի պահվող զենք-զինամթերքը։
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
