Միացյալ Նահանգներն Իսրայելին առաջարկել է սահմանափակել Իրանի դեմ իր պատասխան հարվածի մասշտաբները՝ Վաշինգտոնի կողմից Թեհրանի դեմ նոր տնտեսական պատժամիջոցներ սահմանելու դիմաց։ Դրա մասին չորեքշաբթի հայտնել է Bloomberg-ը՝ վկայակոչելով աղբյուրներին։
Ըստ նրանց՝ ամերիկացի պաշտոնյաները մտավախություն ունեն, որ «Իրանի էներգետիկ ենթակառուցվածքի վրա իսրայելական հարձակումները կարող են ցնցել էներգետիկ շուկաները»։ Վաշինգտոնը փորձում է համոզել Իսրայելին՝ պատասխան հարձակումների համար թիրախներ ընտրելիս սահմանափակվել ռազմական թիրախներով, իսկ ԱՄՆ-ն իր հերթին պատրաստ է խստացնել տնտեսական պատժամիջոցները Թեհրանի դեմ, նշում է Bloomberg-ը։
Ավելի վաղ հրեական պետության պաշտպանության նախարար Յոավ Գալանտը հայտարարել էր, որ Իսրայելը չի հրաժարվում Իրանին հարվածելու ծրագրերից՝ ի պատասխան իր հրթիռային հարձակման, և որ դա այնքան «մահացու և անսպասելի» կլինի, որ իրանցիները ինչ-որ բան հասկանալու համար ժամանակ չեն ունենալու:
