ԱՄՆ Սենատը հաստատել է Մեթյու Ուիթաքերին, որը կարճ ժամանակ զբաղեցրել է գլխավոր դատախազի պաշտոնը նախագահ Դոնալդ Թրամփի առաջին վարչակազմում, ՆԱՏՕ-ում երկրի մշտական ներկայացուցիչ։ Այս մասին հայտնել է Associated Press-ը։ Ուիթակերը հավանության է արժանացել 52 կողմ, 45 դեմ ձայների հարաբերակցությամբ: Ակնկալվում է, որ Ուիթակերը կբանակցի ՆԱՏՕ դաշնակիցների հետ պաշտպանական ծախսերն ավելացնելու համար, ինչպես պահանջել է Թրամփը: Եվ չնայած ԱՄՆ նախագահը նախկինում կասկածի տակ էր դրել դաշինքի երկրներին ռազմական սպառնալիքի դեպքում պաշտպանելու իր պատրաստակամությունը, մարտին Սենատի լսումների ժամանակ Ուիթակերը հավաստիացրել է, որ ԱՄՆ ներկա վարչակազմի հավատարմությունը դաշինքի շրջանակում պարտավորություններին անսասան է, գրել է գործակալությունը։ Ուիթակերը Թրամփի առաջին նախագահական ժամկետի ընթացքում աշխատել է գլխավոր դատախազ Ջեֆ Սեշնսի աշխատակազմի ղեկավարի պաշտոնում: 2018թ. նոյեմբերին ԱՄՆ նախագահը աշխատանքից ազատել է Սեշնսին այն բանից հետո, երբ նա ասել էր, որ անձամբ չի մասնակցի 2016թ. ԱՄՆ ընտրություններին Ռուսաստանի ենթադրյալ միջամտության հետաքննությանը: Ուիթակերը երեք ամիս աշխատել է որպես գլխավոր դատախազի պաշտոնակատար։ 2019թ. փետրվարին նոր գլխավոր դատախազ Ուիլյամ Բարի նշանակումից հետո Ուիթակերը թողել է պետական ծառայությունը եւ աշխատել մասնավոր հատվածում, ինչպես նաեւ հանդես եկել որպես փորձագետ լրատվամիջոցներում: Թրամփի վերադառնալուն պես Ուիթակերը պետք է բարձր պաշտոն ստանար արդարադատության նախարարությունում, սակայն, ի վերջո, նրան տրվել է ՆԱՏՕ-ում մշտական ներկայացուցչի դերը: Ինչպես գրել են ամերիկյան լրատվամիջոցները, Թրամփի՝ Ուիթաքերի ընտրությունն այս պաշտոնում անակնկալ է եղել դաշինքի գծով ԱՄՆ դաշնակիցների համար, քանի որ նա չունի արտաքին կամ անվտանգության քաղաքականության փորձ։
