ԱՄՆ պետական պարտքի արագացված աճը կարող է մեծ խնդիրներ ստեղծել համաշխարհային տնտեսության համար, մասնավորապես՝ զարգացող երկրների համար։ Նման կարծիք է տրվում Global Times (GT) թերթի մեկնաբանության մեջ՝ կապված ամերիկյան պետական պարտքի աննախադեպ 36 տրիլիոն դոլարի գերազանցման հետ։
Թեև ԱՄՆ կառավարությունը տեսանելի ապագայում կարող է պահպանել իր պարտքային համակարգը, «ԱՄՆ պետական պարտքի արագացված աճը դեռևս էական մարտահրավերներ է ստեղծում համաշխարհային տնտեսության, հատկապես զարգացող աշխարհի համար»,–գրում է թերթը։ 2024 թվականի հունվարի սկզբին ամերիկյան պարտավորություններն աճել են մինչև 34 տրիլիոն դոլար, իսկ հուլիսի վերջին այդ ցուցանիշը հասել է 35 տրիլիոն դոլարի։ 35 տրիլիոն դոլարից 36 տրիլիոն դոլարի աճը տևել է ընդամենը երեք ամիս, նշում է թերթը։
Նման արագացված աճը «վտանգում է ԱՄՆ-ի գանձապետարանների նկատմամբ վստահությունը, ինչը կարող է հանգեցնել ավելի բարձր եկամտաբերության և համաշխարհային ֆինանսական շուկաների անկայունության աճին»: Զարգացող երկրների համար այս դինամիկան հաճախ հանգեցնում է կապիտալի արտահոսքի, արժույթի արժեզրկման և փոխառության ծախսերի աճի, ինչը ավելի է բարդացնում նրանց տնտեսական զարգացումը, ասվում է սյունակում:
«Ավելի տագնապալի է, որ ԱՄՆ պարտքի շարունակական աճն այլևս ոչ միայն կարճաժամկետ միտում է, այլ զգալի երկարաժամկետ խնդիր, որը բխում է բարդ և մշտական տնտեսական, քաղաքական և սոցիալական խնդիրների կուտակային ազդեցության հետևանքով», - ասվում է հոդվածում: Պետական ծախսերի (սոցիալական ապահովության, պաշտպանության և ենթակառուցվածքների զարգացման գծով) և հարկային եկամուտների միջև շարունակվող անհավասարակշռությունը գնալով ակնհայտ է դառնում, նշում է հրատարակությունը։
