Fox News-ի վերջին հոդվածը մանրամասնել է Կոնգրեսի երկկուսակցական ջանքերը՝ վերաձևակերպելու Թուրքիայի դիվանագիտական դասակարգումը ԱՄՆ Պետքարտուղարության շրջանակում՝ արտացոլելով Անկարայի աշխարհաքաղաքական հետագծի ավելի լայն վերագնահատումը: Այդ մասին գրել է Politico-ն: Թուրքիայի դիվանագիտական վերադասավորման մասին առաջարկվող ակտը, որը ներկայացրել են Բրեդ Շնայդերն ու Գաս Բիլիրակիսը պնդում է, որ հաշվի առնելով Թուրքիայի խորացող կապերը Ռուսաստանի, Չինաստանի, Իրանի և ՀԱՄԱՍ-ի հետ, ԱՄՆ արտաքին քաղաքականության շրջանակներում անհրաժեշտ է Թուրքիայի դասակարգումը եվրոպական երկրից փոխել մերձավորարևելյանի:
Օրինագծի հիմքում ընկած են հիմնական մտահոգությունները, ներառյալ այն պնդումները, որ Թուրքիան պատսպարում է ՀԱՄԱՍ-ի զինյալներին, աջակցում է Պուտինի ռազմական գործողություններին և խաթարում ՆԱՏՕ-ի միասնությունը՝ միաժամանակ օգտվելով արևմտյան դաշնակցի առավելություններից:
Թուրքական կառավարությունը, սակայն, կտրականապես վիճարկել է այս բնութագրումը, պաշտպանել Թուրքիայի եվրոպական ինքնությունը՝ նշելով նրա անդամակցությունը ՆԱՏՕ-ին, ասոցացված կարգավիճակը ԵՄ-ում և Եվրոպայի խորհրդում ունեցած դերը, որպես ապացույց, որ Թուրքիան շարունակում է լինել Եվրոպայի անբաժանելի մասը: Անկարայի տեսանկյունից քաղաքական դրդապատճառներով արված այդ քայլի նպատակն է թուլացնել Թուրքիայի դիվանագիտական դիրքը:
Ըստ Fox News-ի, եթե վերադասավորումների ակտն ընդունվի, այդ փոփոխությունը կունենա ինչպես բյուրոկրատական, այնպես էլ խորհրդանշական հետևանքներ: Օրինագծի ընդունումը կարող է ավելի սրել ԱՄՆ-Թուրքիա հարաբերությունները, բարդացնել ռազմական համագործակցությունը և փոխել Թուրքիայի դերը ՆԱՏՕ-ում:
Այնուամենայնիվ, քննադատները զգուշացրել են, որ նման քայլը կարող է Թուրքիային ավելի մոտեցնել Ռուսաստանին ու Չինաստանին, թուլացնելով ՆԱՏՕ-ի միասնությունը այն ժամանակ, երբ համախմբվածությունը վճռորոշ նշանակություն ունի:
