Ալժիրը հրամայել է Ֆրանսիայի դեսպանատան 12 աշխատակիցների 48 ժամվա ընթացքում լքել երկիրը։ Այս մասին հայտնել է Ֆրանսիայի արտգործնախարար Ժան-Նոել Բարոն, փոխանցել է France 24-ը։
Դա կապված է Ֆրանսիայում Ալժիրի երեք քաղաքացիների ձերբակալության հետ։
«Ես խնդրում եմ Ալժիրի իշխանություններին չեղարկել վտարման այս միջոցները... եթե մեր պաշտոնյաներին վերադարձնելու որոշումը պահպանվի, մենք այլ ելք չենք ունենա, քան անմիջապես արձագանքելը»,- ասել է Ժան-Նոել Բարոն:
Ուրբաթ ֆրանսիական դատախազությունը երեք ալժիրցիների, այդ թվում՝ հյուպատոսական պաշտոնյայի, մեղադրանք է առաջադրել՝ 2024թ. ապրիլին Փարիզի արվարձանում ալժիրցի ազդեցիկ գործիչ Ամիր Բուհորսի առեւանգմանը մասնակցության կասկածանքով:
Մեղադրական եզրակացությունը կայացվել է Ալժիրի հետ հարաբերությունների բարդ պահին: Երկրի իշխանությունները նշել են, որ այդ քայլը նպատակ ունի խափանել կապերը վերականգնելու վերջին ջանքերը:
Բուհորսը Ալժիրի կառավարության հակառակորդն է եւ ունի ավելի քան մեկ միլիոն հետեւորդ TikTok-ում:
Նա Ֆրանսիայում է 2016-ից եւ քաղաքական ապաստան է ստացել 2023թ.։ Նրա փաստաբանի խոսքով՝ նրան առեւանգել են 2024թ. ապրիլին եւ ազատ են արձակել հաջորդ օրը։
Ալժիրի իշխանությունները պահանջում են ազդեցիկ գործչի վերադարձը դատելու համար, նրա դեմ ձերբակալման ինը միջազգային օրդեր է տրվել, նրան մեղադրում են խարդախության եւ ահաբեկչության մեջ:
