Գազայի հատվածում Իսրայելի կողմից հասցված հարվածների հետևանքով վերջին 24 ժամվա ընթացքում զոհվել է առնվազն 35 պաղեստինցի։ Այս մասին հաղորդել է Կատարի «Ալ Ջազիրա» հեռուստաալիքը՝ հղում անելով Կատարի առողջապահության նախարարությանը։
Նրա խոսքով՝ զոհվածներից առնվազն 8-ը Իսրայելի բանակի կողմից պաղեստինյան անկլավի կենտրոնական մասում գտնվող Նուսեյրաթի փախստականների ճամբարի վրա հասցված հարվածի զոհերն են։ Հաղորդվել է նաև, որ 109 վիրավոր տեղափոխվել է Գազայի հատվածի հիվանդանոցներ։
Նախարարությունը հայտնել է, որ Իսրայելի կողմից տարածաշրջանում մարտական գործողությունների վերսկսումից ի վեր զոհվել է 2308 մարդ, այդ թվում՝ 595 երեխա։ Եվս 5973 մարդ վիրավորվել է։ Իսրայելա-պաղեստինյան հակամարտության սրումից ի վեր՝ 2023 թվականի հոկտեմբերին, զոհերի թիվը գերազանցել է 52,400-ը, վիրավորվել է 118,014 մարդ։ Նշվում է նաև, որ մի քանի հազար մարդ, որոնց մարմինները, ենթադրաբար, մնում են փլատակների տակ, համարվում են անհետ կորած։
Մարտի 18-ին Իսրայելի բանակը վերսկսել է ռազմական գործողությունները Գազայի հատվածում՝ սկսելով զանգվածային հարվածներ անկլավի դեմ և այդպիսով խաթարելով այս տարվա հունվարին հաստատված հրադադարը։
Իսրայելի վարչապետ Բենիամին Նեթանյահուի գրասենյակը սա բացատրել է նրանով, որ արմատական պաղեստինյան «Համաս» շարժումը մերժեց միջնորդների և ԱՄՆ նախագահի հատուկ դեսպանորդ Սթիվեն Վիտկոֆի կողմից բանակցությունների ընթացքում ներկայացված առաջարկները՝ նշելով, որ այդ հատվածում գործողության նպատակը բոլոր պատանդներին ազատ արձակելն է։
Արմատականները ռազմական գործողությունների վերսկսման համար մեղադրել են Իսրայելին և Միացյալ Նահանգներին։
