«Թալիբան» շարժումը հայտարարել է, որ կփակի ազգային եւ օտարերկրյա ոչ կառավարական բոլոր կազմակերպություններն Աֆղանստանում, որոնցում կանայք են աշխատում, տեղեկացրել է Associated Press-ը։
Մինչ այդ, երկու տարի առաջ, Աֆղանստանի իշխանությունները հրամայել էին հասարակական կազմակերպություններին դադարեցնել աշխատանքի ընդունել աֆղանստանցի կանանց՝ իբր այն պատճառով, որ նրանք ճիշտ չեն կրում իսլամական գլխաշորը:
Կիրակի երեկոյան X սոցցանցում հրապարակված նամակում Աֆղանստանի էկոնոմիկայի նախարարությունը նախազգուշացրել է, որ վերջին հրամանը չկատարելը կհանգեցնի այն բանին, որ ՀԿ-ները կկորցնեն իրենց գործունեության լիցենզիան Աֆղանստանում:
Նախարարությունը նշել է, որ պատասխանատու է ազգային եւ օտարերկրյա կազմակերպությունների կողմից իրականացվող բոլոր գործողությունների գրանցման, համակարգման, ուղղորդման եւ վերահսկման համար:
Աֆղանստանի կառավարությունը եւս մեկ անգամ կարգադրում է, որ բոլոր կանայք, որոնք աշխատում են թալիբների կողմից չվերահսկվող հաստատություններում, դադարեցնեն աշխատանքը, նշվել է նամակում։
«Եթե համագործակցություն չլինի, այդ հաստատության գործունեությունը կչեղարկվի, ինչպես նաեւ կչեղարկվի նախարարության կողմից տրված գործունեության լիցենզիան»,- նշվել է գերատեսչության հաղորդագրությունում։
Թալիբներն արդեն արգելել են կանանց աշխատել բազմաթիվ աշխատավայրերում եւ հասարակական վայրերում: Նրանք նաեւ թույլ չեն տալիս նրանց վեցերորդ դասարանից հետո շարունակել կրթություն ստանալ։
