Ադրբեջանի իշխանությունները ինտենսիվացնում են իրենց արշավը արտասահմանում անկախ եւ քննադատական ձայների դեմ՝ ձերբակալման օրդերներ տալով աքսորված լրագրողներին, ակտիվիստներին եւ վերլուծաբաններին՝ քաղաքական դրդապատճառներ ունեցող մեղադրանքներով, տեղեկացրել է Human Rights Watch իրավապաշտպան կազմակերպությունը։
Այս քայլերը Ադրբեջանի ներսում եւ դրսում այլախոհությունը ճնշելու եւ խոսքի ազատությունը սահմանափակելու երկարատեւ ռազմավարության մի մասն են։
Այս գործողություններն արտացոլում են իշխանությունների երկարատեւ պրակտիկան՝ չարաշահելու քրեական արդարադատության համակարգը քննադատներին լռեցնելու համար, ինչը Human Rights Watch-ը տարիներ շարունակ մանրամասնորեն փաստագրել է։
2023թ․ նոյեմբերից ի վեր Ադրբեջանի իշխանությունները ձերբակալում են լրագրողների, քաղաքական ակտիվիստների, մարդու իրավունքների պաշտպանների եւ գիտնականների՝ կեղծ ֆինանսական եւ այլ քրեական մեղադրանքներով, այդ թվում՝ անօրինական ձեռնարկատիրության, փողերի լվացման, հարկերից խուսափելու եւ փաստաթղթերի կեղծման մեղադրանքներով։
Արտերկրում գտնվող ադրբեջանցիների նկատմամբ հետապնդումների վերջին ալիքը հաջորդում է 2025թ․ մարտին մի քանի աքսորված բլոգերների դեմ սկսված բազմաթիվ քրեական հետաքննություններին։ Նրանք մեղադրվել են խարդախության, ահաբեկչության, անկարգություններ հրահրելու, պաշտոնական հրամաններին չենթարկվելու եւ պետական հեղաշրջման փորձ կատարելու մեջ։ Այդ ժամանակվանից ի վեր դատարանները ձերբակալման բազմաթիվ օրդերներ են տվել եւ անձանց դատապարտել հեռակա կարգով։ Վերջերս՝ սեպտեմբերին, դատարանը ֆրանսիացի բլոգեր Մուհամեդ Միրզալիին հեռակա կարգով դատապարտել է վեցուկես տարվա ազատազրկման՝ բազմաթիվ մեղադրանքներով, այդ թվում՝ զանգվածային անկարգություններ հրահրելու։ Ադրբեջանի իշխանությունները պետք է անհապաղ հանեն քաղաքական դրդապատճառներով բոլոր մեղադրանքները, դադարեցնեն անկախ ձայների անդադար հետապնդումները ինչպես երկրի ներսում, այնպես էլ արտերկրում եւ կատարեն խոսքի եւ միավորումների ազատությունը հարգելու իրենց միջազգային պարտավորությունները։
