Վերջին երկու տարվա ընթացքում Մեծ Բրիտանիան լքած ամենահարուստ ձեռնարկատերերի ընդհանուր կարողությունը հասնում է 160 միլիարդ դոլարի։ Նրանք հիմնականում օտարերկրացիներ են, որոնք զրկվել են երկրում գործող հարկային արտոնություններից․ հայտնում է Bloomberg գործակալությունը՝ վկայակոչելով իր Bloomberg Billionaires Index (BBI) վարկանիշային ցուցակի տվյալները։
«Մեծ Բրիտանիայից գերհարուստների զանգվածային արտահոսքը վերածվել է 160 միլիարդ դոլարի խնդրի... Սա ցուցակում ընդգրկված այն անձանց ընդհանուր կարողությունն է, որոնք միայն վերջին երկու տարում թուլացրել են Մեծ Բրիտանիայի հետ իրենց կապերը կամ ամբողջությամբ խզել դրանք», — փոխանցում է գործակալությունը։
Նշվում է, որ այս գումարը գերազանցում է ինդեքսի՝ Մեծ Բրիտանիայում ապրող մասնակիցների համախառն կարողությունը։
Պարբերականի ընտրած խմբի կեսը վերջնականապես լքել է Մեծ Բրիտանիան անցյալ տարվա ապրիլին իրականացված հարկային բարեփոխման նախօրեին՝ տեղափոխվելով, ի թիվս այլ վայրերի, Մոնակո, Շվեյցարիա և ԱՄԷ։ Այն ժամանակ երկրի ֆինանսների նախարար Ռեյչել Ռիվսը չեղարկեց ոչ ռեզիդենտների համար հատուկ հարկային ռեժիմը, որը թույլ էր տալիս հարուստ օտարերկրացիներին արտերկրում ստացված եկամուտները պաշտպանել երկրում հարկումից։
Ինչպես պարզաբանում է գործակալությունը, բարձրացվել են նաև ժառանգվող ակտիվների և մասնավոր շուկաներում գործարքների մասնակիցների եկամտահարկերը, իսկ հետագա փոփոխությունների մասին անվերջ խոսակցությունները շարունակել են ուժեղացնել երկրի հարուստ բնակիչների շրջանում առաջացած մտահոգությունը։
Մեկնածների վերլուծությունը, ինչպես և սպասվում էր, ցույց է տալիս, որ նրանց թվում գերակշռում են օտարերկրացիները։
