Զինվորականները հայհոյում են Պուտինին․ հայկական բանակը «ուկրաինացվում» է

Համացանցում տարածվում է մի տեսանյութ (այն դիտել է 450 հազար օգտատեր), որը հստակորեն ցույց է տալիս Նիկոլ Փաշինյանի օրոք Հայաստանի բանակում տիրող բացիթողի վիճակը և բարոյահոգեբանական մթնոլորտը։ Տեսանյութում շվեյցարացի Սանդրո Շմիդը մոտոցիկլով հասել է պետության առաջնագիծ, և կադրերում հստակ երևում է մարտական հենակետը։ Նրան են մոտենում զինվորականներ, որոնցից մեկը (հագուստից կարելի է կարծել, որ սպա է կամ առնվազն հենակետի ավագը) հայհոյում է Ռուսաստանի Դաշնության նախագահ Վլադիմիր Պուտինին։ Հայհոյողի կողքին կանգնած են նաև այլ զինվորականներ։

Ակտիվորեն տարածվող այս տեսանյութը երկու բանի մասին է վկայում․

1. Առաջնագծում բացիթողի վիճակ է, և ցանկացած մեկը կարող է հասնել այնտեղ ու տեսանկարահանել։ Առաջնագիծը պահող զինվորականները չեն գիտակցում իրենց պարտականությունները․ առաջնագիծ հասած և իրենց հենակետը նկարահանող անձի ինքնությունը չեն ճշտում, այլ պարզապես առաջարկում են հետ գնալ։

2. Բանակը «ուկրաինացվում է», այսինքն՝ հակառուսականությունը ներթափանցում է հայկական բանակ։ Առաջնագծում կանգնած զինվորը կամ սպան իրենց հակառակորդ են համարում ոչ թե Ադրբեջանին, այլ Ռուսաստանի Դաշնության նախագահին։

Այս երկու դրվագներով էլ ՀՀ ՊՆ-ն պետք է կարգապահական վարույթ իրականացնի։ Հայհոյանքի և ոչ պատշաճ վարքագծի համար առնվազն պետք է լինի կարգապահական տույժ, իսկ առաջնագիծ անհայտ անձի ներթափանցման և նրա ինքնությունը չճշտելու համար կարող է նախատեսվել անգամ քրեական պատասխանատվություն։

Եթե ՀՀ ՊՆ-ն արդեն հրապարակային դարձած այս դրվագի մասով հանդես չի գալիս գնահատականներով և քայլերով, ապա կարելի է եզրակացնել, որ առաջնագծի բացիթողի վիճակն ու բանակ ներթափանցած հակառուսականությունը պետական քաղաքականություն են։ Այդ դեպքում պետք է տեղեկանանք ոչ թե պատժի, այլ խրախուսանքի մասին։