Դամասկոսի միջազգային օդանավակայանից դեպի Շարժայի օդանավակայան է մեկնել առաջին օդանավը՝ նշանավորելով Սիրիայի և ԱՄԷ-ի միջև կանոնավոր օդային հաղորդակցության վերականգնումը տարիներ տևած ընդմիջումից հետո:
Այս մասին հայտնել է Syria TV-ն։
Միևնույն ժամանակ, «Սիրիական ավիաուղիներ»-ի գլխավոր տնօրեն Սամեհ Արաբին հայտարարել է, որ նոր գործառնական պլանում սիրիական ավիաուղիների օդանավերը կիրականացնեն շաբաթական հինգ չվերթ դեպի Դուբայ, երեք չվերթ դեպի Շարժա և երկու չվերթ դեպի Աբու Դաբի։
Արաբին հավելել է, որ «Սիրիական ավիաուղիներ»-ը քայլեր է ձեռնարկում աստիճանաբար ավելացնելու թռիչքների քանակը՝ նշելով, որ դեպի ԱՄԷ և հակառակ ուղղությամբ ուղևորությունների պահանջարկն անընդհատ աճում է։
ԱՄԷ-ի քաղաքացիական ավիացիայի գլխավոր վարչությունն ավելի վաղ հայտարարել էր մի քանի տարվա ընդմիջումից հետո դեպի Սիրիա առաջիկայում թռիչքների վերսկսման մասին։
Հարկ է նշել, որ երկու երկրների միջև թռիչքների վերսկսումը տեղի է ունեցել Սիրիայի նախագահ Ահմադ աշ-Շարաայի՝ ԱՄԷ կատարած այցից հետո, որտեղ քննարկումներ են եղել տարբեր ոլորտներում, այդ թվում՝ տնտեսական ոլորտում համագործակցության շուրջ:
