«Մեծաթիվ բնակչությանն ուղղված ԷԽ և ՎԷ բարձր ազդեցությամբ ցուցադրական-պիլոտային միջոցառումներ» ծրագրի շրջանակում Սևանի համայնքապետարանի վարչական շենքի տանիքին տեղադրվել է 50 կիլովատտ ժամ հզորության արևային համակարգ։
Ինչպես տեղեկացրին Սևանի համայնքապետարանի աշխատակազմից, «Հայաստանի վերականգնվող էներգետիկայի և էնեգախնայողության հիմնադրամի» և Սևանի համայնքապետարանի համագործակցության արդյունքում՝ ֆինանսավորմամբ Գերմանիայի միջազգային համագործակցության ընկերության, իրողություն է դառնում 50 կՎտ արևային ֆոտովոլտային համակարգի տեղադրումը, որը էներգախնայողությանն ուղղված հիմնարար նախաձեռնություն է:
Ծրագրի իրականացման համար Սևանի համայնքապետարանի կողմից կատարվել է ծրագրի ընդհանուր արժեքի 20 տոկոսի ներդրում: Արևային ֆոտովոլտային համակարգի տեղադրումը կատարվել է «Էկովիլ» ՍՊԸ-ի կողմից:
Արևային համակարգի տեղադրմանը զուգահեռ` համայնքապետարանի վարչական շենքի տանիքում իրականացվել են նաև ջերմամեկուսացման աշխատանքներ, որի շնորհիվ էներգաարդյունավետությանն ուղղված միջոցառումները լիովին ծառայելու են իրենց նպատակին:
Օրեր անց համակարգը կգործի, որի արդյունքում հասարակական նշանակության ևս մեկ շենքում կարձանագրվեն էներգիայի խնայողության և վերականգնվող էներգիայի օգտագործման տեսանելի ցուցանիշներ:
