Փետրվարի 24-ին Երեւանի քաղաքապետարանում հրավիրված սելեկտորային խորհրդակցությունում ներկայացվել է «Կասկադ» ճարտարապետական համալիրի վերակառուցման վերջնական նախագիծը։ Հանրային քննարկումների արդյունքներով ընտրվել է ֆրանսիացի ճարտարապետ Ժան Միշել Վիլմոնտի «Մշակութային կասկադ» հայեցակարգը։ 20 մլրդ 46 մլն դրամի նախագիծը կիրականացվի 5 տարվա ընթացքում։ Այն ավելի շատ կենտրոնացած է մշակութային կենտրոն ստեղծելու վրա։ Նախագիծը ներկայացնում է տեկտոնական սալեր, որոնք կազմում են վերացական Կասկադ՝ այժմ գոյություն ունեցողի վերեւի մասում:Այն նախատեսում է համալիրի անմիջական հարեւանությամբ գտնվող կանաչ տարածքների լայնածավալ վերականգնում։ Նախագիծը բաղկացած է հասարակական անցումներից, որոնք լրացվում են տերասներով, սրճարաններով եւ ռեստորաններով: Կենտրոնական հատվածում նախատեսված է 1 000 նստատեղով համերգասրահ։ Նախագծի առանձնահատկություններից մեկը ժամանակակից արվեստի նոր կենտրոնն է՝ քաղաքին նայող ընդարձակ տերասներով: Կենտրոնը, ինչպես կարծում է նախագծի հեղինակը, լայն հնարավորություններ կբացի մշակութային փոխանակման առումով։
