Ատոմային էներգիայի միջազգային գործակալության մասնագետների հերթական խումբը հոկտեմբերի 24-ին սկսել է ծովի ջրի ստուգումը «Ֆուկուսիմա-1» ատոմակայանի շրջանում, որտեղ ավարտվել է ռադիոակտիվ մասնիկներից մաքրված ջրի բացթողման երկրորդ փուլը։ Այս մասին տեղեկանում ենք ՏԱՍՍ գործակալությունից:
Այդ ստուգումն, ինչպես ավելի վաղ հայտնել էր Ճապոնիայի ԱԳՆ-ն, կտևի մինչեւ հոկտեմբերի 27-ը։
Նշվում է, որ ՄԱԳԱՏԷ-ի փորձագետների այս խմբում ընդգրկված են մասնագետներ մի քանի երկրներից, մասնավորապես՝ Ռուսաստանից, Չինաստանից, Հարավային Կորեայից և ԱՄՆ-ից։ Միաժամանակ ընդգծվում է, որ բոլոր փորձագետները գործում են անձնական անկախ կարգավիճակով։
2011 թվականի մարտին ցունամին շարքից հանել էր «Ֆուկուսիմա-1» ատոմակայանի էներգետիկական և հովացման կայանքներն, ինչը հանգեցրել էր երեք ռեակտորների միջուկային վառելիքի հալեցման, դրանց կորպուսների քայքայման, պայթյունների և մեծ քանակությամբ ռադիոակտիվ նյութերի արտանետման: Ներկայումս կայանի տարածքը և հարակից շրջանները գործնականում մաքրված են։ Սակայն միջուկային վառելիքի բեկորների սառեցման համար մշտապես ջուր է լցվում քայքայված ռեակտորների մեջ, որը ճեղքերից դուրս է հոսում ռադիոակտիվ խիստ աղտոտվածությամբ:
Այն մաքրված է, սակայն դրանից հետո էլ պարունակում է տրիտում՝ ջրածնի ռադիոակտիվ իզոտոպ, որը չի ենթարկվում հեռացման։ Այժմ ատոմակայանի տարածքում կուտակվել է ավելի քան 1,34 մլն տոննա ջուր։ Այդ կապակցությամբ Ճապոնիայի կառավարությունը որոշում է ընդունել այն աստիճանաբար լցնել օվկիանոսը: Այդ գործողությունը կտևի 30-40 տարի։ Ծրագիրը հավանության է արժանացել ՄԱԳԱՏԷ-ի կողմից, սակայն հարուցում է որոշ երկրների, առաջին հերթին Չինաստանի դժգոհությունը:
