Իրականացնելու ենք «արտադրված է Հայաստանում» քաղաքականությունը. Արթուր Խաչատրյան

Հայաստանին անհրաժեշտ է մրցունակ ու բարգավաճող գյուղատնտեսություն։ Այս մասին«Հայաստան» դաշինքի նախընտրական ծրագրի սոցիալ-տնտեսական բաժնի ներկայացման ժամանակ հայտարարել է պատգամավոր Արթուր Խաչատրյանը։

«Հիմա մենք 25 տարի հետ ենք գնացել։ Գրչի մի հարվածով գյուղատնտեսության նախարարությունը քանդվեց։ Մեր վարելահողերի կեսից ավելը չի մշակվում։ Դրա համար սենց հորթի հրճվանքով ասում են վա՜յ Ղազախստանից 4-րդ կարգի ցորեն ենք ներմուծել։ Սա երկար շարունակվել չի կարող», - ընդգծել է Խաչատրյանը։

Նա նկատել է, որ այսօր հողակտորները հիմնականում փոքր են, ինչը թանկ ու բարդ է դարձնում դրանց մշակումը։ «Մենք խթանելու ենք կոոպերացիան և հողերի խոշորացումը՝ սեփականության իրավունքի պահպանմամբ»,- պարզաբանել է Խաչատրյանը՝ հավելելով, որ պետությունն աջակցելու է գյուղացիներին՝ բարձրարժեք սերմեր, տնկիներ ու տոհմային անասուններ ձեռք բերելու հարցում։ Քանի որ գյուղատնտեսությունը գիտատար ոլորտ է, գյուղացիներին կտրամադրվի նաև խորհրդատվական օգնություն։ Ծրագրով նախատեսվում է մինչև 15 միլիոն դրամի արտոնյալ՝ զրոյական տոկոսադրույքով վարկավորում, շուկայականից էժան վառելիք ու սերմացու, ջրային ռեսուրսների կառավարման արդյունավետ համակարգի ներդրում, ինչպես նաև իրացման ու արտահանման հարցերով աջակցություն։ Իսկ ռազմավարական նշանակության մթերքների համար կսահմանվի լավագույն գինը։