Այսօր Վերաքննիչ քրեական դատարանում ՀՀ երկրորդ նախագահ Ռոբերտ Քոչարյանի գույքի և բանկային հաշիվների վրա դրված կալանքի գործով դատախազների ներկայացրած բողոքի քննությունն ավարտվեց։ Դատավոր Արսեն Նիկողոսյանը հեռացել է խորհրդակցական սենյակ, որոշումը կհրապարակվի այսօր՝ ժամը 16։30-ին։
«Քանի անգամ նշել եմ այդ փաստաթղթերի վերադարձի մասին, որն անարձագանք է մնացել։ Իմ տպավորությամբ, սա մի պրակտիկա է, որը Հայաստանում գոյություն ունի, ենթադրում եմ, որովհետև այնքան սովորական է օրենք խախտվում և սովորական ձևով արձագանք լինում: Զարմանալի է, օրինակ՝ կենսաթոշակի հարցով, ես ասում եմ՝ ես պետք է կոմունալ ծախսեր հոգամ, ես պետք է փաստաբանական ծախսեր հոգամ, ինչո՞ւ եք դուք այդպես անում, որ ես ունենալով հնարավորություն, օգտվեմ իմ բարեկամների, իմ հարազատների աջակցությունից, ինձ համար դա պատիվ չէ, արձագանքը նույնն է: Ենթադրում եմ, որ պրակտիկա է, երբ մարդուն զրկում են ամեն ինչից, իր հնարավորություններից, անգամ պաշտպանվելու հնարավորությունից, մեկ նպատակով, երևի, խեղճացնելու համար…»,-ասաց Քոչարյանը:
