Ողջաբերդի բնակիչներն այսօր՝ փետրվարի 24-ին, փակել են գյուղի ճանապարհը: Նրանք պահանջում են հետ վերադարձնել գյուղի վարչական ղեկավար Աշոտ Մուշեղյանին:
«Մենք ունեցել ենք վարչական ղեկավար՝ Աշոտ Մուշեղյանը, որն աշխատել է 2 տարի եւ գյուղի համար արել է այնքան բան, որ չի արվել նախկին ղեկավարի ժամանակ 30 տարվա ընթացքում: Հիմա չգիտես ինչու, մեր մարզպետը իրեն գործից հանել է՝ պատճառաբանելով, որ իրավապահ մարմինների հետ ունեցել է խնդիրներ: Նա այդ երկու տարում ամբողջ գյուղն ասֆալտապատել է, լուսավորել է, գերեզմանները ցանկապատել է, դաշտ իջնող ճանապարհը ուղղել է: Ամեն ինչ արվել է այս երկու տարվա մեջ:
Աշոտ Մուշեղյանը դեմ էր այս ակցիային, բայց մենք համախմբվել ենք եւ ուզում ենք հետ բերել իրեն: Մարզպետը մեզ խոստացավ, որ հարցերը կարգավորեն, նորից կվերականգնեն Աշոտին, մարդն իր հարցերը կարգավորեց, արդարացրեցին իրեն: Հիմա մարզպետը պատճառաբանում է, որ իր հետ չի կարող աշխատել եւ նախկին ղեկավարի տղուն է բերել նշանակել:
8 ամիս մենք չենք ունեցել վարչական ղեկավար: Այդ 8 ամսվա ընթացքում օտարվել են հողեր, որից գյուղացիները տեղյակ չեն եղել: Դրանք գյուղնշանակության հողեր են եղել, որոնցից գյուղացիները օգտվել են: Մեր գյուղը թալանում են»,-ասաց ակցիայի մասնակիցներից մեկը:
Ոստիկանները փորձում են բացել ճանապարհը՝ նշելով, որ մարդիկ շտապում են. «Թողեք ճանապարհը բացենք, հետո ձեզ կլսենք եւ ձեզ հետ միասին ձեր ձայնը կբարձրացնենք այնտեղ, որտեղ պետք է»:
Ակցիայի մասնակիցները նշեցին, որ 10 րոպեով փակում են ճանապարհը, ապա կբացեն:
