Ներքին գործերի նախարարի տեղակալ Արմեն Ղազարյանը ապրիլի 3-ին ընդունել է Վիետնամի Սոցիալիստական Հանրապետության հանրային անվտանգության նախարարի տեղակալ Չան Քուոկ Տոյի գլխավորած պատվիրակությանը:
ՆԳՆ-ից հայտնում են, որ հանդիպման ընթացքում կողմերն անդրադարձել են ներքին անվտանգության, թմրամիջոցների ապօրինի շրջանառության դեմ պայքարի, կիբեռանվտանգության, միգրացիայի և քաղաքացիության, մարդու իրավունքների պաշտպանության և մի շարք այլ հարցերի: Բարձր գնահատելով երկու երկրների միջև ձևավորված համագործակցությունը՝ Արմեն Ղազարյանը մասնավորապես ընդգծել է անվտանգության ոլորտում փոխգործակցության զարգացման անհրաժեշտությունը։
Ներկայացնելով Ներքին գործերի նախարարությունում ընթացող բարեփոխումները՝ փոխնախարարն անդրադարձել է ոստիկանության, փրկարար ծառայության և միգրացիայի ոլորտներում իրականացված ինստիտուցիոնալ փոփոխություններին:
Չան Քուոկ Տոն շնորհակալություն է հայտնել ջերմ ընդունելության համար։ Նշելով, որ հանցագործությունները սահմաններ չեն ճանաչում, ընդգծել է, որ այս հանդիպումը հանցավորության դեմ համատեղ պայքարի ուղղությամբ ևս մեկ կարևոր քայլ է։
Կարևորվել է հանցավորության, հատկապես՝ կիբեռհանցագործությունների և թմրամիջոցների ապօրինի շրջանառության դեմ պայքարում համագործակցության շարունակականությունը: Անդրադառնալով միգրացիոն հոսքերի կառավարման, անօրինական միգրացիայի դեմ պայքարի հարցերին՝ կողմերը պատրաստակամություն են հայտնել համատեղ ուժերով մշակել արդյունավետ մեխանիզմներ:
Հանդիպման ավարտին համագործացությունն ընդլայնելու պայմանավորվածություն է ձեռք բերվել։ Ընդգծվել է փորձի փոխանակման և երկկողմ այցերի կազմակերպման անհրաժեշտությունը:
