ՀՀ ԱԺ տարածաշրջանային եւ եվրասիական ինտեգրման հարցերի մշտական հանձնաժողովի նիստին ՀՀ էկոնոմիկայի նախարար Վահան Քերոբյանը ներկայացրեց Եվրասիական տնտեսական միության և նրա անդամ պետությունների՝ մի կողմից և Սինգապուրի Հանրապետության՝ մյուս կողմից, միջև ազատ առևտրի համաձայնագրի վավերացման նպատակահարմարության վերաբերյալ նախագիծը:
Նախարարը ներկայացրեց, որ համաձայն ապրանքների, ծառայությունների և ներդրումների շուկա մուտքի ազատականացման մասով համաձայնությունների հիման վրա պետք է ձևավորվի Սինգապուրի հետ արտոնյալ առևտրի մասով փոխադարձ պարտավորությունների միասնական փաթեթ:
«Քաղաքացիական պայմանագիր» խմբակցության պատգամավոր Խաչատուր Սուքիասյանն ընդգծեց, որ պետք է բացել «ազատ առևտրի գոտի» հասկացությունը:
«Ինչ որ դուք ասացիք, կապ ունի ԵԱՏՄ հարթակի հետ, ազատ առևտրի գոտու հետ կապ չունի»,- ասաց նա՝ դիմելով նախարարին: Պատգամավորը կարևորեց տնտեսվարողներին բացատրել, թե ինչ է նշանակում զրո մաքսատուրք Սինգապուրի պես երկրի համար:
Վահան Քերոբյանը ներկայացրեց, որ 2022 թվականին ՀՀ արտաքին առևտրաշրջանառությունը 70 տոկսով աճել է և մասնավորապես Գերմանիայի հետ առաջին անգամ հատել է 500 միլիոն դոլարի սահմանաչափը, իսկ Խաչատուր Սուքիասյանը կարևորեց կառուցվածքը, թե դա արդյոք եղել է հումք, թե պատրաստի արտադրանք: Վահան Քերոբյանն ասաց, որ կոնկրետ Գերմանիայի մասով 350 մլն դոլարի ներմուծվել և 150 մլնի արտահանվել է և գլխավոր ապրանքատեսակը թեթև և խոշոր մարդատար մեքենաներն են, շինարարական տեխնիկան է, իսկ արտահանման դեպքում առաջին տեղում ալյումինե փայլաթիթեղներն են:
Խաչատուր Սուքիասյանը հարցրեց, թե արդյոք կրթական ոլորտում համագործացկություն նախատեսվում է, և նշեց. «Հաշվի առնելով մեր երկրի համար Սինգապուրի կարևորությունը՝ պետք է կրթական և մշակութային մակարդակով համագործակցել նրանց հետ»: Իսկ նախարարն ասաց, որ կրթական համագործակցությունը ծառայությունների համաձայնագրով է լինելու, սակայն դա առանձին երկկողմ համագործակցության խնդիր է, և համաձայնեց պատգամավորի հետ՝ կրթական ոլորտում համագործակցութան կարևորության հարցում:
