ԱՄՆ նախագահ Դոնալդ Թրամփը հոկտեմբերի 14-ին հայտարարել է, որ Գրենլանդիայում պատրաստվում են սկսել նավթի, գազի և օգտակար հանածոների «հսկայածավալ» հետախուզական աշխատանքներ։ Այս մասին Թրամփը նշել է Truth Social հարթակում գրառման մեջ։
«Կան փորձագետներ, որոնք նշում են, որ հեշտ հասանելի նավթի քանակը մեծապես գերազանցում է աշխարհի գրեթե ցանկացած վայրի պաշարներին, և որ ավելի կարևոր է՝ անվտանգության տեսանկյունից ինչպես Ամերիկայի Միացյալ Նահանգների, այնպես էլ Եվրոպայի պաշտպանության և հարձակողական գործողությունների համար այն անգերազանցելի է», - նշել է նա գրառման մեջ։
Թրամփը մանրամասներ չի հայտնել Գրենլանդիայում նախատեսվող հետախուզական աշխատանքների վերաբերյալ, սակայն նշել է, որ Միացյալ Նահանգների վրա ցանկացած ապագա հարձակում պետք է անցնի Գրենլանդիայի տարածքով, որտեղ պաշտպանական համակարգերը կանոնավոր կերպով կխոցեն անօդաչու թռչող սարքերը, հրթիռները կամ զենքի ցանկացած այլ տեսակ, որը դեռ նույնիսկ նախագծված չէ։
«Այն մեզ ապահովում է ժամանակով, դիրքով և տեսանելիությամբ այնպես, ինչպես աշխարհի ոչ մի այլ վայրում», - հավելել է Թրամփը։
Սեպտեմբերին Միացյալ Նահանգները, Դանիան և Գրենլանդիան համաձայնագիր ստորագրեցին՝ նպատակ ունենալով վերջ դնել լարվածությանը, որն առաջացել էր ռազմավարական նշանակություն ունեցող և օգտակար հանածոներով հարուստ կղզու նկատմամբ վերահսկողություն հաստատելու վերաբերյալ Թրամփի հնչեցրած բազմակի սպառնալիքներից հետո։
Համաձայնագիրն ընդլայնում է ԱՄՆ զինված ուժերի դերը Դանիայի կազմի մեջ մտնող Գրենլանդիայում՝ հիմք ստեղծելով երկու նոր ռազմակայանի և ամերիկյան «Ոսկե գմբեթ» (Golden Dome) հրթիռային պաշտպանության համակարգի տեղակայման համար՝ միաժամանակ վերահաստատելով Դանիայի ինքնիշխանությունը և գրենլանդացիների ինքնորոշման իրավունքը։
