Դաշնային մաքսային ծառայության, ԱԴԾ-ի և Ներքին գործերի նախարարության աշխատակիցները ձերբակալել են Ֆրանսիայի քաղաքացու, որը Սեն Ռեմի թանգարանից գողացել է ավելի քան 53 միլիոն ռուբլու արժողությամբ ոսկե մետաղադրամների հավաքածու և վաճառել դրանք Մոսկվայում, հայտնել է Ռուսաստանի Դաշնային մաքսային ծառայությունը իր կայքում։
«Ֆրանսիայի Սեն Ռեմի պետական թանգարանից 53 միլիոն ռուբլու արժողությամբ ոսկե մետաղադրամների հավաքածու գողացած Ֆրանսիայի քաղաքացու գործունեությունը կասեցվել է Ռուսաստանի Դաշնային մաքսային ծառայության աշխատակիցների կողմից՝ Ռուսաստանի Դաշնային անվտանգության ծառայության և Ռուսաստանի Ներքին գործերի նախարարության հետ համատեղ», - ասվում է հայտարարության մեջ։
29-ամյա Անտոնի Կաստելեյնը աշխատել է պատմության թանգարանում և, չարաշահելով իր պաշտոնական դիրքը, գաղտնի դուրս է բերել որոշ ցուցանմուշներ։ Ցուցանմուշների մեջ ներառված էին Հռոմեական կայսրության և Նապոլեոն III-ի գահակալության ժամանակաշրջանի ոսկե մետաղադրամներ։
Իրավապահ մարմինների աշխատակիցները պարզել են, որ տղամարդը 2023-2024 թվականներին մի քանի անգամ այցելել է Մոսկվա։ Մաքսային ստուգումն առանց որևէ խնդրի անցնելու համար նա գողացված մետաղադրամները թաքցրել է դրամապանակի մանրադրամի խցիկում և խառնել դրանք եվրոցենտների հետ։
Ռուսաստանի Դաշնային մաքսային ծառայության մաքսային հետաքննությունների և նախնական հետաքննությունների վարչությունը քրեական գործ է հարուցել Ռուսաստանի քրեական օրենսգրքի 226.1 հոդվածի 1-ին մասի («Մշակութային արժեքների խոշոր չափերով մաքսանենգություն») համաձայն։ Այս հանցագործությունը նախատեսում է մինչև հինգ տարի ազատազրկում կամ մինչև 1 միլիոն ռուբլի տուգանք։ Ներկայումս քննչական գործողություններ են ընթանում։
