Հինգշաբթի օրը եվրոպական երկրների ղեկավարները զրուցել են ԱՄՆ նախագահ Դոնալդ Թրամփի հետ՝ Վոլոդիմիր Զելենսկու հետ Կիևին անվտանգության երաշխիքների վերաբերյալ գագաթնաժողով անցկացնելուց հետո, եթե Ուկրաինայում պատերազմի դադարեցման մասին խաղաղության համաձայնագիր կնքվի, գրում է AFP-ն։
Այսպես կոչված «ցանկացողների կոալիցիայի» երաշխիքները, որոնք գաղտնի են պահվում, սակայն, ինչպես սպասվում է, կներառեն ուկրաինական բանակի ուժեղացված մարզումներ և որոշ եվրոպական պետությունների կողմից զորքերի տեղակայում, բարկացրել են Ռուսաստանին։
Դրանք Ֆրանսիայի նախագահ Էմանուել Մակրոնի նախաձեռնության մի մասն են, որի նպատակն է ցույց տալ, որ Եվրոպան կարող է գործել Վաշինգտոնից անկախ կերպով՝ այն բանից հետո, երբ Թրամփը փոխել է ԱՄՆ արտաքին քաղաքականությունը և Սպիտակ տուն վերադառնալուց հետո ուղղակի բանակցություններ է սկսել Ռուսաստանի առաջնորդ Վլադիմիր Պուտինի հետ։
Մակրոնի և Մեծ Բրիտանիայի վարչապետ Քիր Սթարմերի համանախագահությամբ տեղի ունեցած գագաթնաժողովը նպատակ ուներ համաձայնեցնել Ուկրաինայի անվտանգության երաշխիքների վերաբերյալ ծրագրերը հրադադարի դեպքում և ավելի հստակ պատկերացում կազմել ԱՄՆ-ի մասնակցության մասին։
Միացյալ Նահանգները բանակցություններում ներկայացրել է Թրամփի հատուկ բանագնաց Սթիվ Ուիթքոֆը, ով նաև առանձին հանդիպել է Զելենսկու հետ։ Որոշ ղեկավարներ, ինչպես, օրինակ, Զելենսկին, անձամբ են մասնակցել, իսկ մյուսները, ներառյալ Սթարմերը, մասնակցել են հեռակա կարգով։ Թրամփի հետ խոսակցությունը տեղի է ունեցել տեսակոնֆերանսի ռեժիմով։ Գագաթնաժողովի ժամանակ Սթարմերը հայտարարել է, որ անհրաժեշտ է «ավելի հեռուն գնալ և ճնշում գործադրել Պուտինի վրա՝ ռազմական գործողությունները դադարեցնելու համար»,- հայտարարել է Դաունինգ սթրիթի ներկայացուցիչը։
«Վարչապետը հայտարարել է, որ Պուտինին չի կարելի վստահել, քանի որ նա շարունակում է ձգձգել խաղաղ բանակցությունները և միաժամանակ հանդուգն հարձակումներ իրականացնել Ուկրաինայի վրա», - հավելել է նա։
«Ցանկացողների կոալիցիան» ներառում է մոտ 30 երկիր, որոնք աջակցում են Ուկրաինային։ Դրանք հիմնականում եվրոպական երկրներ են, բայց նաև Կանադան, Ավստրալիան և Ճապոնիան։
