Հայաստանում ռուսական ռազմաբազան իր մարտունակությամբ կանխում է ագրեսիան. Երկրորդ ռուսական ռազմակայանի շնորհիվ եւ ՀԱՊԿ-ի անդամակցության շնորհիվ մենք պատրաստել ենք մոտ 4 հազար սպա եւ դա արվել է անվճար: Այս մասին այսօր՝ նոյեմբերի 4-ին, լրագրողների հետ զրույցում նշեց պաշտպանության նախկին նախարար Վաղարշակ Հարությունյանը՝ հավելելով, որ խոսքը մոտ 8900 մլն դոլարի մասին է:
Մյուս կողմից, ըստ նրա, Հայաստանում բանակաշինության գործում մեծ դեր է ունեցել Ռուսաստանի հետ համագործակցությունը: «Երբ մենք ունեցանք հնարավորություն եւ պատրաստեցինք սպաներ, մենք ունեցանք կորուստների 3-4 անգամ նվազում»,-ասաց Վաղարշակ Հարությունյանը:
Անդրադառնալով օրերս Տավուշի ուղղությամբ Ադրբեջանի զինուժի գործողություններին, Վաղարշակ Հարությունյանը հիշեցրեց, որ ՀԱՊԿ պայմանագրում նշված է, որ կարող են միջամտել ագրեսիայի դեպքում միայն: Նրա խոսքով, Ադրբեջանի զինուժի այդ գործողություններն ագրեսիա չեն. «Ագրեսիան այն է, երբ քո տարածքն են վերցնում: Երկրորդ ՀԱՊԿ-ի պայմանագրում նշված է, որ կառույցը միջամտում է, երբ տվյալ պետությունը դիմում է իրեն: Եթե մենք համրում ենք անհրաժեշտ, որ մեր ուժերը բավարար չեն, կարող ենք դիմել: Մենք Ադրբեջանի զինուժի գործողությունները կանխում ենք միայն այն ուժերով, որոնք իրականացնում են մարտական ծառայություն: Մենք նույնիսկ զորք չենք ուղարկում այնտեղ: Սիմիրիկինը բազմիցս հայտարարել է, որ եթե լինի ագրեսիա, ՀԱՊԿ-ն կկատարի իր գործողությունները»,-ընդգծեց Հարությունյանը:
Նա անդրադարձավ նաեւ հայտարարություններին, որ ՌԴ-ն դեմ չէ, որ Ադրբեջանը մաս կազմի ՀԱՊԿ-ին: Հարությունյանը հիշեցրեց, որ ժամանակին Ադրբեջանը եղել է ՀԱՊԿ անդամ. «Սակայն անցավ երկու տարի եւ մի անգամ նիստերից մեկում հեյդար Ալիեւը ՌԴ նախագահ Ելցինին ասաց՝ մենք մտել ենք ՀԱՊԿ, որ Ղարաբաղի հարցը լուծվի, բայց չի լուծվում, ՀԱՊԿ-ը չի աջակցում Ադրբեջանին: Ելցինը պատասխանեց, որ ՀԱՊԿ-ն գործում է միայն ագրեսիայի դեպքում, իսկ Ղարաբաղի հարցը լուծվում է այլ սկզբունքներով: Մոտեցումը որ հիմա Ադրբեջանը կդառնա ՀԱՊԿ անդամ, ես գրեթե բացառում եմ: Այս իրավիճակում Ադրբեջանը չի դիմելու այդ հարցով եւ այդտեղ կա Թուրքիայի գործոնը: Թուրքիան իր վերահսկողությունն է հաստատել Ադրբեջանի բանակում: Մյուս կողմից հայաստանը դա թույլ չի տա»,-ասաց նա:
