Հայ գիտնականների ավանդն անգլերենով լուսաբանելու և միջազգային լսարանին հասանելի դարձնելու ծրագրի շրջանակում Բյուրականի աստղադիտարանը հյուրընկալել էր Գյումրու տնտեսագիտական վարժարանի 11-րդ դասարանի աշակերտներին։
Այս մասին հայտնում է Բյուրականի աստղադիտարանի մամուլի ծառայությունը:
Անգլերենի դասընթացի շրջանակում իրականացվող այս նախագծի ընթացքում աշակերտները ստեղծում են թվայնացված աուդիոգիդեր, որոնք նախատեսված են Վիկտոր Համբարձումյանի տուն-թանգարանում օգտագործման համար։ Արդեն պատրաստված աուդիոգիդերի մի մասը թվայնացվել է անգլերենով և վերածվել QR կոդերի, որոնք սկանավորելով՝ այցելուները կարող են տեղեկանալ Բյուրականի աստղադիտարանի պատմությանը և գործունեությանը։
Նախագծային աշխատանքը ղեկավարում է 11-րդ դասարանի անգլերենի դասագրքի համահեղինակ Օհաննա Ավետիսյանը, իսկ նյութն ընտրված է նշված դասագրքում առաջարկվող թեմաներից։
Նախագծի շրջանակում աշակերտներն իրականացնում են աստղագիտական ուղղվածության մեկ այլ աշխատանք ևս. ուսումնասիրում են կյանքի գոյության հնարավորությունն այլ մոլորակների վրա։ Աշխատանքի նպատակն է ստեղծել կրթական խաղ, որը կցուցադրի, թե ինքնագնաց ռոբոտն ինչպես կարող է գործունեություն ծավալել Մարս մոլորակի վրա։
Ձեռք է բերվել ծրագիրը շարունակելու և Բյուրականի աստղադիտարանի այլ այցելավայրերի ներգրավմամբ ընդլայնելու պայմանավորվածություն:
