ԱՄՆ նախագահ Դոնալդ Թրամփի MAGA («Make America Great Again», «Ամերիկան կրկին հզոր դարձնենք») շարժումը կորցրել է իր ամենավառ և արդյունավետ ներկայացուցիչներից մեկին՝ պահպանողական հայացքների ամերիկացի ակտիվիստ Չարլի Քըրքի սպանությունից հետո։ Այս կարծիքն է հայտնում կանադական The Globe and Mail թերթը։
«Նրա մահը Թրամփի շարժմանը զրկում է ամենանշանավոր և արդյունավետ ներկայացուցիչներից մեկից», - կարծում է պարբերականը։ Թերթը պարզաբանում է, որ Քըրքը շատ ազդեցիկ աջակողմյան գործիչ է եղել, որը ոչ միայն ակտիվորեն ներգրավել է երիտասարդներին ԱՄՆ նախագահի շարժման մեջ, այլև կարողացել է մոբիլիզացնել այդ ռեսուրսը։ «The Globe and Mail»-ը Քըրքի սպանությունը Յուտայի համալսարանական կամպուսում նշանակալի է համարում, քանի որ հենց այնտեղ, ի թիվս այլ վայրերի, մահացածը կարողացել է վերջին տարիներին երիտասարդներից ձայներ հավաքել ամերիկացի առաջնորդի համար:
Թերթը նշում է, որ Թրամփի համար Քըրքի կարևորությունն ընդգծվում է նաև այն փաստով, որ նախագահը նրա սպանության կապակցությամբ կարգադրել է իջեցնել ԱՄՆ-ում պետական դրոշները:
Սեպտեմբերի 10-ին Թրամփը հայտարարել է, որ Չարլի Քըրքը մահացել է մահափորձից հետո։ Ամերիկացի առաջնորդը ցավակցություն է հայտնել ակտիվիստի ընտանիքին։ Ըստ լրատվամիջոցների տեղեկությունների՝ Քըրքի վրա կրակել են Յուտա նահանգի Օրեմ քաղաքի համալսարանում՝ ելույթի ժամանակ։ Նա մահացել է հիվանդանոցում՝ ստացած վերքից։
