ԱԺ փոխխոսնակ Ալեն Սիմոնյանն այսօր լրագրողների հետ զրույցում անդրադարձավ «Իմ քայլը» խմբակցության անդամ Հայկ Սարգսյանի առաջարկին՝ 10 մլն դրամ վճարելով՝ արագացված մեկամսյա զինվորական ծառայություն անցնել: Սիմոնյանը հաստատեց, որ նախագիծն իրենց ներկայացնելուց առաջ է հանրայնացվել:
«Ես ողջունում եմ, որ նախ և առաջ հասկանանք հանրային տրամադրությունները: Այն, որ պետք է ունենանք արհեստավարժ Զինված ուժեր, կարծում եմ՝ որևէ մեկի մոտ կասկած չի առաջացնում: Այն, որ ցանկալի է, որ սահմանագիծը պահեն ոչ թե նորակոչիկները՝ 18-19 տարեկան երիտասարդները, այլ ավելի մեծ փորձ ունեցող մարդիկ, նույնպես որևէ մեկի մոտ կասկած չի առաջացնում, և փաստը, որ որոշ մարդիկ դրա պատճառով լքում են Հայաստանը, նույնպես որպես խնդիր առկա է, ուստի պետք է լուծում տանք»,- ասաց Սիմոնյանը:
ԱԺ փոխխոսնակն ընդգծեց՝ երբ որևէ մեկը լուծում է տալիս խնդրին, ասում են՝ ճիշտ չէ, սակայն չեն շտկում, նոր բան չեն առաջարկում, նշանակում է՝ որևէ բան չեն անում, իսկ դա սխալ է:
