Ադրբեջանական զորքերի Հայաստանի տարածքից դուրսբերման խնդիրը պետք է լուծվի սահմանազատման արդյունքում։ Այս մասին օգոստոսի 21-ին լրագրողների հետ զրույցում հայտարարել է ՀՀ վարչապետ Նիկոլ Փաշինյանը։
Նա հիշեցրել է, որ հայկական տարածքի մոտ 200 քառակուսի կիլոմետրը օկուպացված է Ադրբեջանի կողմից։ Միաժամանակ Փաշինյանը հավելել է, որ Ադրբեջանի որոշ տարածքներ գտնվում են Հայաստանի վերահսկողության տակ։ «Մենք համաձայնության եկանք Ադրբեջանի հետ, որ ճանաչում ենք միմյանց տարածքային ամբողջականությունը՝ հիմք ընդունելով նախկին խորհրդային հանրապետությունների սահմանները», - նշել է նա։
Վարչապետը շեշտել է, որ թե՛ Հայաստանը, թե՛ Ադրբեջանը ունեն բոլոր համապատասխան քարտեզները՝ նշելով, որ Կիրանց-Ոսկեպար սահմանային հատվածի դելիմիտացիան և դեմարկացիան կատարվել է այդ քարտեզների հիման վրա։
«Հետագա գործընթացը պետք է իրականացվի այս քարտեզների համաձայն և խնդիրը պետք է լուծվի այս համատեքստում։ Եթե կան տարածքների համաչափ փոխանակում իրականացնելու մտադրություններ և ցանկություններ, այսինքն՝ 1 քառակուսի կիլոմետր տարածքը փոխանակել 1 քառակուսի կիլոմետրի դիմաց, ապա մենք պետք է դիմենք ժողովրդին և պարզենք, թե արդյոք նրանք համաձայն են այս մոտեցման հետ», - եզրափակել է նա։
