Թուրքիայի արտգործնախարար Հաքան Ֆիդանը հայտարարել է, որ Ուկրաինայի հակամարտության կարգավորման շրջանակներում անվտանգության երաշխիքների հարցը ներկայումս մնում է քննարկման փուլում և չի լուծվել։ Այս մասին նա ասել է Անկարայում Հունգարիայի արտաքին գործերի նախարար Պետեր Սիյարտոյի հետ բանակցություններից հետո կայացած մամուլի ասուլիսում։
«Ռուսաստանի և Ուկրաինայի միջև պատերազմի համատեքստում այսօր մենք հասել ենք մի կետի, երբ ամերիկյան նոր վարչակազմը խթանում է խաղաղության օրակարգը, և դա, իհարկե, ողջունելի զարգացում է մեր տարածաշրջանի և ողջ մարդկության համար: Հուսով ենք, որ կողմերը հնարավորինս արագ համաձայնության կգան մշտական հրադադարի շուրջ։ Ներկայումս, կարծես թե, կա կոնսենսուս մի շարք հարցերի շուրջ, որոնք, մեր կարծիքով, կարող են հանգեցնել հրադադարի», - ասաց Ֆիդանը, ավելացնելով, որ դրանք ներառում են «նավափոխադրումների անվտանգությունը, էներգետիկ օբյեկտների թիրախավորումը և գերիների փոխանակումը»:
«Մյուս կողմից, երբ խոսքը խաղաղ լուծման մասին է, առաջանում է անվտանգության երաշխիքների հարցը։ Այս թեմայի շուրջ քննարկումները, հետազոտությունները և լուծումների որոնումները շարունակվում են տարբեր մակարդակներում և տարբեր ձևաչափերով։ Որպես Թուրքիա՝ մենք կշարունակենք ամենայն աջակցություն ցուցաբերել ինչպես հրադադարի, այնպես էլ համապարփակ խաղաղ բանակցությունների համար»,- հավելել է Թուրքիայի արտգործնախարարը։
