Լեհաստանի վարչապետ Դոնալդ Տուսկը հայտարարել է, որ բազմաթիվ հարցեր ունի նախկին կառավարությանը՝ նրա ներկայացուցիչների վրա Ռուսաստանի հնարավոր ազդեցության համատեքստում, իսկ «Օրենք և արդարություն» կուսակցության առաջնորդ Յարոսլավ Կաչինսկին ասել է, որ իրավիճակը հակառակն է, հայտնում է RMF24-ը։
Հինգշաբթի օրը Դոնալդ Տուսկը, ելույթ ունենալով Սեյմում, բարձրացրել է հեռացող դատավորի հարցը, ով ցանկանում էր «քաղաքական ապաստան» ստանալ Բելառուսում, և դրանից հետո նա անցավ նախկին կառավարության քննադատությանը՝ ռուսական և բելառուսական ազդեցությունից պաշտպանվելու համատեքստում։
Ի թիվս այլ բաների, Տուսկն ասաց, որ «եթե պաշտպանության որևէ նախարար աներ այնպիսի բաներ, ինչպես պարոն Մակյերևիչն ու նրա թիմը, ապա դավաճանության մասին աղմուկ կբարձրանար», և նաև հարցրեց, թե հեռավոր անցյալում Յարոսլավ Կաչինսկին կարող էր արդյոք «երկար ամիսներ շփվել ՊԱԿ-ի գործակալ Անատոլի Վասինի հետ, ինչը նա ինքն է խոստովանել»։
«Եվ ծառայությունները, դատախազությունը, և ռուսական ազդեցության հանձնաժողովը, որը մենք կստեղծենք սահմանադրությանը համապատասխան, շատ ուշադիր կուսումնասիրեն՝ առանց տեսախցիկների, առանց կրկեսների և մեդիա փառատոների, Ռուսաստանի և Բելառուսի ազդեցությունը «Միասնական աջերի» կառավարության վրա», - ասել է Տուսկը:
Կաչինսկին մեկնաբանել է 1989 թվականին Վասինի հետ հանդիպումները՝ նշելով, որ դա ուղղակիորեն կապված է Լեխ Վալեսայի Մոսկվա այցի կազմակերպման համատեքստում՝ այն ժամանակ նրա պարտականությունների հետ, և որ շփումները դադարեցվել են, քանի դեռ նա պաշտոններ է զբաղեցրել կառավարությունում։ Նա անիմաստ է անվանել այդ իրադարձությունների հետ կապված մեղադրանքները։
Կաչինսկին նաև ասել է, որ կան «բազմաթիվ ապացույցներ, որոնք ցույց են տալիս, որ ռուսական օրակարգն այստեղ հետևողականորեն իրականացվում է, ինչպես դա եղել է նրանց (Տուսկի քաղաքական ուժերի) նախկին իշխանության ժամանակ։
«Այն, ինչ նրանք անում են հիմա, ցանկացած մտածող մարդու համար, 100%-ով վկայում է այն ամենի, ինչ ես մի ժամանակ ասել եմ, և ինչն այն ժամանակ դատապարտվել է, որ իրենց իշխանության ներքո Լեհաստանը դառնում է գերմանա-ռուսական համատիրություն։ Հիմա, միգուցե, ավելի շատ գերմանական, ավելի քիչ՝ ռուսական, բայց դեռ ռուսական»,- ի պատասխան ասել է Կաչինսկին։
