Սաուդյան Արաբիայի գահաժառանգ արքայազն Մուհամեդ բեն Սալման ալ Սաուդը հանդիպել է ԱՄՆ պետքարտուղար Մարկո Ռուբիոյի հետ, որը Ջիդդա քաղաք է ժամանել ուկրաինական պատվիրակության հետ բանակցություններ վարելու համար։ Այս մասին հաղորդում է Մամուլի սաուդյան գործակալությունը (SPA):
Գահաժառանգ արքայազնը և պետքարտուղարը դիտարկել են երկկողմ հարաբերությունների ամրապնդման հնարավորությունները, ինչպես նաև քննարկել միջազգային ու տարածաշրջանային անվտանգության հասնելու համար գործադրվող ջանքերը:
Սաուդյան Արաբիայում ամերիկյան և ուկրաինական պատվիրակությունների բանակցությունները կանցկացվեն մարտի 11-ին։
Սաուդյան Արաբիա մեկնելու ճանապարհին Ռուբիոն լրագրողներին ասել էր, որ ԱՄՆ նախագահ Դոնալդ Թրամփը հույս ունի, որ ռուս-ուկրաինական հակամարտությունը կլուծվի դիվանագիտական միջոցներով, և որ նոր հակառուսական պատժամիջոցներ չեն պահանջվի։
Ռուբիոն նաև հայտարարել էր, որ Կիևին օգնության մատակարարման վերսկսումը կախված կլինի Ջիդդայում բանակցությունների արդյունքից։ Նա նշել էր, որ ԱՄՆ-ն պետք է տեսնի, որ Ուկրաինան շահագրգռված է խաղաղության շուրջ բանակցություններով։
