Կառավարությունն իր այսօրվա՝ մարտի 27-ի նիստում որոշեց ԿԳՄՍ նախարարության «Երևանի հ.8 արհեստագործական պետական ուսումնարան» և «Երևանի հ.9 արհեստագործական պետական ուսումնարան» ՊՈԱԿ-ները միաձուլել եւ վերակազմակերպել որպես «Երևանի արհեստի պետական քոլեջ» ՊՈԱԿ:
Հիմնավորման մեջ նշվում է, որ Երևանում գործում են թվով 6 պետական ուսումնական հաստատություն և 7 պետական ուսումնական հաստատությունում իրականացվում է արհեստագործական կրթական ծրագիր:
Երևանի Նոր Արեշ, Բուռնազյան 14 հասցեում գործող «Երևանի հ. 8 արհեստագործական պետական ուսումնարանում» ներկա պահին սովորում են շուրջ 349 ուսանող՝ 7 մասնագիտություններով:
Իսկ Վարդաշեն, 6-րդ փողոց, 66 հասցեում գործող «Երևանի հ.9 արհեստագործական պետական ուսումնարանում» ներկա պահին սովորում են շուրջ 248 ուսանող 10 մասնագիտություններով:
Երկու ուսումնարաններում առկա է 5 մասնագիտությունների համընկնում և ունեն ուսումնական գործընթացի կազմակերպման համար մի քանի անգամ շատ տարածք, որը չի օգտագործվում և լրացուցիչ ֆինանսական միջոցներ են տրամադրվում պահպանման նպատակով:
Երևանի հ. 8 արհեստագործական պետական ուսումնարանի» մասնաշենքում ներկա պահին իրականացվում են հիմնանորոգման աշխատանքներ, որի ավարտը նախատեսված է 2025 թվականին:
Վերանորոգումից հետո «Երևանի արհեստի պետական քոլեջ» ՊՈԱԿ-ն իր ուսումնական գործընթացը կիրականացնի այդտեղ: Նախատեսված է նաև հաստատությանը տրամադրել անհրաժեշտ նյութատեխնիկական բազա՝ բոլոր ուսուցանվող մասնագիտությունների համար:
Հաշվի առնելով, որ մինչև 2026 թվականը շարունակվելու է արհեստագործական և միջին մասնագիտական ուսումնական հաստատությունների օպտիմալացման գործընթացը՝ «Երևանի հ. 9 արհեստագործական պետական ուսումնարան» ՊՈԱԿ-ի շենքի հետագա տնօրինման հարցին անդրադարձ կլինի Երևան քաղաքում օպտիմալացման գործընթացի ավարտից հետո:
