Լեհաստանը «Արեւելյան վահան» ծրագրի շրջանակում հակահետեւակային ականներ կտեղադրի Ռուսաստանի եւ Բելառուսի հետ սահմանին, հայտնել է պաշտպանության փոխնախարար Պավել Բեյդան RMF-ի եթերում։ Դրա համար հանրապետությունը դուրս կգա Օտտավայի կոնվենցիայից, որն արգելում է նման զենքերը։ Լիտվան, Լատվիան եւ Էստոնիան ծրագրում են դա անել Լեհաստանի հետ միասին։ Բոլոր չորս երկրներն էլ ԵՄ եւ ՆԱՏՕ անդամ են։ Օտտավայի կոնվենցիան չեղյալ հայտարարելու պատճառների մասին հարցին Բեյդան պատասխանել է, որ Լեհաստանը «ընտրություն չունի», քանի որ իրավիճակը սահմանին «լուրջ է»։ «Մենք մտահոգություններ ունենք, որոնք սահմանակից են վստահությանը, որ Բելառուսը գործում է Ռուսաստանի վերահսկողության ներքո։ Ինչ էլ ասի Վլադիմիր Պուտինը, Ալեքսանդր Լուկաշենկոն կհամաձայնի դրան։ Հիշեք, թե որ կողմից է հարձակվել Ուկրաինան՝ Բելառուսի տարածքից»,- ասել է Բեյդան։ Նրա խոսքով՝ Լեհաստանը ներկայում չունի հակահետեւակային ականներ, սակայն մտադիր է դրանք արտադրել։ Խոսքը միլիոն հատի մասին է։ «Դա կանեն լեհական զինախմբի գործարանները, բայց ես չեմ ուզում մանրամասնել... Մենք հավասարապես ենք վերաբերվում մասնավոր եւ պետական պաշտպանական արդյունաբերությանը», - եզրափակել է Բեյդան:Ռուսաստանի եւ Բելառուսի հետ սահմանին ամրություններ ստեղծելու «Արեւելյան վահան» ծրագիրը ներկայացվել է 2024թ. մայիսին։ Դրա շրջանակում նախատեսվում է փորել 800 կիլոմետր երկարությամբ փոսեր, տեղադրել հակատանկային ոզնիներ, ամրություններ, ցանկապատեր եւ ստեղծել տեսահսկման համակարգ։ Գլխավոր շտաբի պետ, գեներալ Վեսլավ Կուկուլան նույնպես խոսել է ականապատ դաշտեր պատրաստելու իր մտադրության մասին, որոնք կհամալրվեն միայն այն ժամանակ, երբ Լեհաստանը վստահ լինի «պատերազմի անխուսափելիության մեջ»։ 2024թ. ՆԱՏՕ 10-ից ավելի երկրների բարձրաստիճան զինվորականները Ռուսաստանի ագրեսիան դաշինքի երկրների դեմ անվանել են մոտ ապագայի իրատեսական սցենար:Նոյեմբերին ավարտվել է «Արեւելյան վահանի» առաջին փուլը, որը ներառում էր ցանկապատերի, բետոնապատ «վիշապի ատամների» եւ հակատանկային խրամատների կառուցումը։ «Սա ներդրում է խաղաղության համար»,- այն ժամանակ ասել էր վարչապետ Դոնալդ Տուսկը՝ զննելով Կալինինգրադի մարզի հետ սահմանին գտնվող կառույցները։ Լեհաստանը համակարգում է գործողություններն իր մերձբալթյան հարեւանների հետ, որպեսզի թույլ չտա ռուսական զորքերին շրջանցել ամրությունները, որոնք կներառեն նաեւ սենսորներ եւ հակաօդային պաշտպանության համակարգեր։«Մենք ցանկանում ենք, որ մեր սահմանն ապահով լինի խաղաղության եւ անանցանելի՝ պատերազմի ժամանակ»,- նշել է Տուսկը: Նրա խոսքով՝ Լեհաստանը ռազմավարական դիրք է զբաղեցնում ՆԱՏՕ եւ Եվրամիության արեւելյան թեւում եւ այդ պատճառով իրեն պատասխանատու է զգում մայրցամաքի ողջ անվտանգության համար։ Սպասվում է, որ «Արեւելյան վահանի» կառուցման աշխատանքները կտեւեն մինչեւ 2028թ.։ Ընդհանուր առմամբ, նախագիծը Լեհաստանին կարժենա 10 մլրդ զլոտի կամ 2,5 մլրդ դոլար:
