Երկուշաբթի Իլոն Մասկի եղբայրը՝ Քիմբալ Մասկը, քննադատել է ԱՄՆ նախագահ Դոնալդ Թրամփին իր մաքսային քաղաքականության համար, հայտնում է NBC News-ը։
Թրամփի սակագնային ռազմավարությունը նշանակում է մշտական հարկ ամերիկացիների համար, ասել է նա։
«Ո՞վ կմտածեր, որ Թրամփը իրականում Ամերիկայի ամենաբարձր հարկեր վճարող նախագահն է սերունդների ընթացքում։ Իր սակագնային ռազմավարության միջոցով Թրամփը կառուցվածքային, մշտական հարկ է սահմանել ամերիկացի սպառողի վրա», - գրել է Քիմբալը իր եղբոր «X» սոցիալական ցանցում։
Նա հավելել է, որ եթե նույնիսկ Թրամփին հաջողվի մաքսատուրքերի միջոցով ստեղծել նոր աշխատատեղեր, գները երկրում դեռ բարձր կմնան։ Սպառման հարկը կմնա «ավելի բարձր գների տեսքով», - ասել է նա, քանի որ ԱՄՆ-ն չի կարող ամեն ինչ արտադրել։
«Սպառման հարկը նաև նշանակում է ավելի քիչ սպառում: Դա նշանակում է ավելի քիչ աշխատատեղեր: Ինչն իր հերթին հանգեցնում է ավելի քիչ սպառման: Եվ հետո էլ ավելի քիչ աշխատատեղեր: Ամերիկան անհավատալի ուժեղ կողմեր ունի: Մենք պետք է օգտագործենք այդ ուժեղ կողմերը և չստիպենք խաղալ մեր թույլ կողմերի վրա: Նույնն է մնացած աշխարհի դեպքում»,- եզրափակել է նա:
NBC-ն նշում է, որ Քիմբալ Մասկը Tesla-ի տնօրենների խորհրդի անդամ է, որտեղ Իլոն Մասկը զբաղեցնում է գլխավոր տնօրենի պաշտոնը։ Երկու եղբայրներն էլ 1990-ականներին հիմնել են Zip2 կոչվող տեխնոլոգիական ստարտափ, որը սկսել է իրենց բիզնես կարիերան:
Լրատվամիջոցը հավելել է, որ Քիմբալ Մասկը անցյալ տարի նկարագրել է իրեն որպես գրանցված դեմոկրատ՝ ի տարբերություն իր եղբոր, ով ընդունել է Դոնալդ Թրամփի «Դարձրե՛ք Ամերիկան կրկին մեծ» քաղաքականությունը։
