Անկախ Պետությունների Համագործակցության (ԱՊՀ) և Հավաքական անվտանգության պայմանագրի կազմակերպության (ՀԱՊԿ) ուժային կառույցների փոխգործակցությունը տարածաշրջանում կայունության հուսալի ապահովման և հակամարտությունների առաջացման ռիսկերի նվազեցման երաշխիքն է։ Այս մասին «Սոյուզնիկի. ՕԴԿԲ» («Դաշնակիցներ. ՀԱՊԿ») պարբերականին հայտնել է ԱՊՀ գլխավոր քարտուղար Սերգեյ Լեբեդևը։
«ԱՊՀ-ի և ՀԱՊԿ-ի պրոֆիլային կառույցների միջև փոխգործակցության ակտիվացումն ու ընդլայնումը հուսալի գործիք է դառնում տարածաշրջաններում անվտանգության ապահովման և լարվածության նվազեցման համար», - նշել է Լեբեդևը։
Համագործակցության գլխավոր քարտուղարի խոսքով՝ ԱՊՀ և ՀԱՊԿ երկրների զինված ուժերի, արտակարգ ծառայությունների և իրավապահ մարմինների ներկայացուցիչների կանոնավոր համատեղ վարժանքները «գլոբալ և տարածաշրջանային բնույթի հրատապ մարտահրավերների և սպառնալիքների դեմ համատեղ գործելու՝ երկրների պատրաստակամության վկայությունն են»։
«Պաշտպանության և այլ շահագրգիռ գերատեսչությունների միջև գործողությունների համակարգումը թույլ է տալիս մեր փոխգործակցությունը հասցնել որակապես նոր մակարդակի, նպաստում է տարբեր միասնական համակարգերի կատարելագործմանն ու զարգացմանը՝ նպատակ ունենալով պաշտպանել մեր պետությունների շահերը», - հավելել է նա։
Ընդ որում, Լեբեդևն ուշադրություն է հրավիրել, որ նման միջոցառումները նաև օգնում են վերլուծել իրավիճակը մի ամբողջ շարք հարցերի շուրջ, ինչպիսիք են գլոբալ, տարածաշրջանային և տեղեկատվական անվտանգության ապահովումը, արտաքին գործոնների ազդեցությունն ԱՊՀ և ՀԱՊԿ երկրներում ներքաղաքական իրավիճակի վրա, ինչպես նաև թմրամիջոցների ապօրինի շրջանառության, ահաբեկչության և անօրինական միգրացիայի դեմ պայքարի միջոցները:
