Մենք բավականին ծավալուն զեկույց ենք պատրաստում, որը կներկայացնենք ԿԸՀ-ին. այն բաղկացած է լինելու երկու մասից, մի հատվածում նշված են լինելու ողջ նախընտրական քարոզչության ընթացքում արձանագրված խախտումները, իսկ երկրորդ մասում հենց բուն քվեարկության օրվա խախտումները: Այս մասին այսօր՝ ապրիլի 2-ին, մամուլի ասուլիսի ժամանակ նշեց Պառլամենտարից մի զարգացման միջազգային կենտրոնի նախագահ Գոհար Մելոյանը:
«Մեր դիտորդական առաքելության հետ կապված մեկ-երկու հոգու կողմից սպառնալիքներ են հնչեցվել՝ մեզ զրպարտության վիրավորանքի շրջանակներում դատական հայցեր ներկայացնելու տեսքով։ Իմ փաստաբանական ընկերությունը բավականին հարուստ փորձ ունի այդ ուղղությամբ և մենք սպասում ենք նման հայցերի, որովհետև անհիմն զուտ մանիպուլատիվ բնույթի մեղադրանքներ էին: Ես ակնկալում եմ առնվազն ներողության հայցում հանրային կերպով, որովհետև իրենց խոսքն ուղղակի զրպարտություն և վիրավորանք էր մեր անաչառ գործունեության վերաբերյալ»,-ասաց նա:
Անդրադառնալով խախտումներին, Մելոյանն ասաց. «Դրանք թե՛ տեխնիկական էին, թե՛ բովանդակային: Նախ, մի շարք տեղամասերում ուղիղ հեռարձակումը այնպես էր տեղադրված, որ ողջ պրոցեսը չէր երևում: Երկրորդ, մի շարք տեղամասային կենտրոնների սենյակները այնքան փոքր էին, որ հազիվ կազմակերպվում էր օրվա ընտրական գործընթացը և տեղավորվում էին հանձնաժողովի անդամները, ինչը խաթարում էր բնականոն ընտրական գործընթացը։
Բովանդակային խախտումներից էր տրցակներով տրվող քվեաթերթիկները: Քաղաքացին, երբ մոտենում է հանձնաժողովի անդամին, իր առջև պետք է բոլոր ուժերի քվեաթերթիկները հավաքվեն և տրցակով տան։ Մի շարք տեղամասերում արձանագրեցինք, որ սկսեցին հանձնաժողովի անդամները նախապես հավաքել և տրամադրել։ Արդյունքում ես ունեցել եմ դեպք, երբ քաղաքացին մտնում է քվեախցիկ և բարձրաձայնում է, որ իր համար ցանկալի ուժի քվեաթերթիկը չի գտնում։ Քաղաքացուն նոր քվեաթերթիկների տրցակ տրամադրվեց։
Հաջորդը, քաղաքացին մտնում է, քվեարկություն է իրականացնում, դուրս է գալիս, հանձնաժողովի անդամը առանց դրոշմանիշը փակցնելու թողել էր, որ քաղաքացին քվեատուփի մեջ նետի քվեարկության ծրարը։ Այս դեպքում քաղաքացու ձայնը կորում է, որովհետև վավեր են համարվում միայն այն քվեաթերթիկները, որոնց վրա փակցված է դրոշմանիշը:
Լայնամաշտաբ խախտումները տեղամասային կենտրոնների տարածքում կուտակումներն էին: Ընդ որում կային վերահսկող քաղաքացիներ, ինչի տեսագրությունը ունենք, որոնք հատուկ ուղղորդումներ էին իրականացնում կազմված ցուցակներով: Մենք պարբերաբար դիմում էինք ոստիկաններին, որ այդ անձանց այնտեղից հեռացնեն, քանի որ հստակ օրենսդրական պահանջ կա 50 մետր շառավղով շարունակական ներկայությունը որևէ անձի բացառելու»,-ասաց նա:
Գոհար Մելոսյանը նաեւ նշեց, որ բացահայտել են ՔՊ-ի վստահված անձանց սխեմատիկ գործունեություն ցուցակների տեսքով. «Անգամ որոշ դիտորդական առաքելություններ կարծես մեր նկատմամբ էլ էին դիտորդություն իրականացնում՝ նշելով, որ դա ընդամենը տեխնիկական խնդիր է: Այդ հաշվարկները զուտ տեխնիկական չէին, տարբեր բնույթի նշումներ էին իրականացնում: Մեր պնդումը այն է, որ վերահսկողություն էր իրականացվում այն քաղաքացիների նկատմամբ, ովքեր պետք է իրականացնեին քվեարկությունը։
Օրը ամփոփվեց նաև լուսանջատումներով մի շարք տեղամասային կենտրոններում, ինչի վերաբերյալ ահազանգեցի»,-ասաց Գոհար Մելոյան:
