ԱՄՆ նախագահ Դոնալդ Թրամփն իր կարողությունը 2024 թվականի 2,3 միլիարդ դոլարից 2025 թվականին հասցրել է 5,1 միլիարդ դոլարի։ Այս մասին հայտնում է ամերիկյան Forbes ամսագիրը իր՝ աշխարհի ամենահարուստ մարդկանց 39-րդ վարկանիշում։
Ըստ ամսագրի՝ «մի քանի միլիարդատերեր ավելի լավ տարի են անցկացրել, քան Դոնալդ Թրամփը, և ոչ միայն այն պատճառով, որ նա կրկին նախագահ դարձավ: Նախքան Սպիտակ տուն վերադառնալը նա համալրել է իր ունեցվածքը կրիպտոարժույթում շատ շահավետ ներդրումներով»:
Forbes-ի տվյալներով՝ Դոնալդ Թրամփի կարողության հիմնական մասը գոյանում է անշարժ գույքից։ Նա նաև ունի գոլֆի դաշտեր, շքեղ առանձնատներ, գինեգործարան և 1991 թվականին թողարկված Boeing 757-200 ինքնաթիռ, որը հայտնի է որպես Trump Force One:
Ավելի քան 3000 մարդ, որոնց ընդհանուր կարողությունը կազմում է ռեկորդային 16,1 տրիլիոն դոլար, հայտնվել է ամսագրի ցուցակում: Ինչպես նշում է Forbes-ը, առաջին անգամ երեք մարդ ունեն ավելի քան 200 միլիարդ դոլար կարողություն։
